బెంగాల్‌లో ఫాల్తా రీపోలింగ్‌లో బీజేపీ ఘనవిజయం... టీఎంసీ అభ్యర్థికి డిపాజిట్ గల్లంతు

పశ్చిమ బెంగాల్‌లోని ఫాల్తా అసెంబ్లీ నియోజకవర్గంలో జరిగిన రీపోలింగ్ ఓట్ల లెక్కింపులో బీజేపీ ఘన విజయం సాధించింది. ఆదివారం వెలువడిన ఫలితాల్లో బీజేపీ అభ్యర్థి దేబాంగ్షు పండా ఏకంగా 1,09,021 ఓట్ల భారీ ఆధిక్యంతో గెలుపొందారు. అధికార తృణమూల్ కాంగ్రెస్ (టీఎంసీ) అభ్యర్థి నాలుగో స్థానానికి పడిపోయి, డిపాజిట్ కోల్పోవడం గమనార్హం.

ఓట్ల లెక్కింపులో దేబాంగ్షు పండాకు 1,49,666 ఓట్లు రాగా, సీపీఐ(ఎం) అభ్యర్థి శంభునాథ్ కుర్మీ 40,645 ఓట్లతో రెండో స్థానంలో నిలిచారు. కాంగ్రెస్ అభ్యర్థి అబ్దుర్ రజాక్‌కు 10,084 ఓట్లు, తృణమూల్ కాంగ్రెస్ అభ్యర్థి జహంగీర్ ఖాన్‌కు కేవలం 7,783 ఓట్లు మాత్రమే వచ్చాయి. 

ఫాల్తా ఫలితాలు రెండు విధాలుగా చారిత్రాత్మకమైనవి. 1988లో తృణమూల్ కాంగ్రెస్ పార్టీ స్థాపించిన తర్వాత ఒక ఎన్నికలో ఆ పార్టీ అభ్యర్థి నాలుగో స్థానానికి పరిమితం కావడం ఇదే తొలిసారి. అలాగే, 2011లో అధికారంలోకి వచ్చిన తర్వాత టీఎంసీ అభ్యర్థి డిపాజిట్ కోల్పోవడం కూడా ఇదే మొదటిసారి.

ఏప్రిల్ 29న జరిగిన అసలు పోలింగ్‌లో ఫాల్తా నియోజకవర్గంలో తీవ్ర అక్రమాలు జరిగాయన్న ఆరోపణలు వెల్లువెత్తాయి. బీజేపీ అభ్యర్థికి సంబంధించిన ఈవీఎం బటన్‌పై టేపులు వేయడం, వందలాది మంది ఓటర్లను ఓటు వేయకుండా అడ్డుకోవడం వంటి ఘటనలు చోటుచేసుకున్నాయి. దీనిపై ప్రత్యేక ఎన్నికల పరిశీలకుడు సుబ్రతా గుప్తా విచారణ జరిపి నివేదిక సమర్పించారు. ఆ నివేదిక ఆధారంగా కేంద్ర ఎన్నికల సంఘం (ఈసీఐ) మే 21న ఫాల్తా నియోజకవర్గం మొత్తం రీపోలింగ్‌కు ఆదేశించింది.

ఈ విజయంతో పశ్చిమ బెంగాల్ అసెంబ్లీలో బీజేపీ సభ్యుల సంఖ్య 208కి చేరింది. తృణమూల్ బలం 80గా ఉంది.