చివరి లీగ్ మ్యాచ్.. ఆర్సీబీపై టాస్ గెలిచిన సన్‌రైజర్స్

ఐపీఎల్ 2026లో తన చివరి మ్యాచ్‌లో సన్‌రైజర్స్ హైదరాబాద్ జట్టు రాయల్ ఛాలెంజర్స్ బెంగళూరుపై టాస్ గెలిచి బ్యాటింగ్ ఎంచుకుంది. హైదరాబాద్‌లోని రాజీవ్ గాంధీ అంతర్జాతీయ స్టేడియంలో జరుగుతున్న ఈ మ్యాచ్‌లో భారీ స్కోరు చేసి, దానిని కాపాడుకోవాలని లక్ష్యంగా పెట్టుకున్నట్లు సన్‌రైజర్స్ కెప్టెన్ ప్యాట్ కమిన్స్ తెలిపాడు.

టాస్ గెలిచిన అనంతరం కమిన్స్ మాట్లాడుతూ... "మేం ముందుగా బ్యాటింగ్ చేస్తాం. పాయింట్ల పట్టికలో టాప్-2లో నిలవడం కష్టమే అయినా, ఈ రాత్రి గట్టిగా ప్రయత్నిస్తాం. ఫైనల్స్‌కు ముందు కొన్ని కొత్త విషయాలను పరీక్షించుకోవడానికి, మా బలాన్ని అంచనా వేసుకోవడానికి ఇది మంచి అవకాశం. ఈ సీజన్‌లో ఇప్పటికే ప్లేఆఫ్స్‌కు అర్హత సాధించడం సంతోషంగా ఉంది," అని అన్నాడు. ఉప్పల్ స్టేడియంలో అభిమానుల మద్దతు అద్భుతంగా ఉందని, సొంతగడ్డపై చివరి మ్యాచ్‌ను కూడా విజయంతో ముగించాలని ఆశిస్తున్నట్లు చెప్పాడు. గత మ్యాచ్‌లో ఆడిన జట్టుతోనే బరిలోకి దిగుతున్నట్లు కమిన్స్ స్పష్టం చేశాడు.

మరోవైపు ఆర్‌సీబీ కెప్టెన్ రజత్ పటీదార్ మాట్లాడుతూ... "మేం ఎక్కడికి వెళ్లినా మాకు హోమ్ గేమ్‌లానే ఉంటుంది. పాయింట్ల పట్టికలో ఎక్కడ ఉన్నామనే దానితో సంబంధం లేకుండా, ప్రతి మ్యాచ్‌లోనూ అత్యుత్తమ ప్రదర్శన చేయడమే మా లక్ష్యం" అని అన్నాడు. వేలి గాయం కారణంగా బెతెల్ ఈ మ్యాచ్‌కు దూరమయ్యాడని, అతని స్థానంలో తాను జట్టులోకి వచ్చానని పటీదార్ వివరించాడు.