రూ.7,400 కోట్లకు రెండు పిజ్జాలు.. చరిత్రలో నిలిచిపోయిన ఆ రోజు!

ఒక ప్రోగ్రామర్ రెండు పిజ్జాలు కొనుగోలు చేశాడు. ఇందులో వింతేముంది అంటారా? కానీ దాని కోసం అతను చెల్లించిన ధర తెలిస్తే ఎవరైనా ఆశ్చర్యపోవాల్సిందే. 2010 మే 22న లాస్లో హానీక్జ్ అనే ప్రోగ్రామర్ 10,000 బిట్‌కాయిన్లు చెల్లించి రెండు పిజ్జాలు కొన్నాడు. అప్పట్లో ఆ బిట్‌కాయిన్ల విలువ కేవలం 41 డాలర్లు (సుమారు రూ.3,000). కానీ, నేడు అవే 10,000 బిట్‌కాయిన్ల విలువ ఏకంగా రూ.7,400 కోట్లకు పైమాటే. అందుకే, ఈ రోజును ప్రపంచవ్యాప్తంగా 'బిట్‌కాయిన్ పిజ్జా డే'గా జరుపుకుంటారు.

ఈ సంఘటన కేవలం మీమ్స్, జోకులకే పరిమితం కాలేదు. ఇంటర్నెట్‌లో కేవలం ఒక ప్రయోగంగా ఉన్న బిట్‌కాయిన్‌ను నిజ ప్రపంచంలో ఒక కరెన్సీగా మార్చిన చారిత్రాత్మక లావాదేవీ ఇది. ఈ ఒక్క పిజ్జా ఆర్డర్, ఆ తర్వాత కొన్ని ట్రిలియన్ డాలర్ల విలువైన క్రిప్టో పరిశ్రమకు పునాది వేసింది. కాయిన్‌డీసీఎక్స్ సహ వ్యవస్థాపకులు సుమిత్ గుప్తా చెప్పినట్లుగా, "ఇది బిట్‌కాయిన్‌కు లభించిన తొలి వాస్తవ ప్రపంచ గుర్తింపు. ఆ క్షణంలో బిట్‌కాయిన్ ఇంటర్నెట్ కోడ్ స్థాయి నుంచి వాస్తవ ఆస్తిగా మారింది" ఎలాంటి బ్యాంకులు, పేమెంట్ గేట్‌వేలు లేకుండా ఇద్దరు వ్యక్తుల మధ్య నమ్మకంతో జరిగిన ఈ లావాదేవీ ఆర్థిక ప్రపంచ గతిని మార్చేసింది.

'డిజిటల్ బంగారం'గా ప్రస్థానం
ఆ రెండు పిజ్జాల నుంచి మొదలైన బిట్‌కాయిన్ ప్రయాణం 16 ఏళ్లలో ఊహించని స్థాయికి చేరింది. ఒకప్పుడు ప్రోగ్రామర్లు, టెక్ నిపుణులకే పరిమితమైన బిట్‌కాయిన్, ఇప్పుడు వాల్‌స్ట్రీట్, ప్రభుత్వాలు, ప్రపంచవ్యాప్తంగా ఉన్న దిగ్గజ సంస్థల దృష్టిని ఆకర్షిస్తోంది. అమెరికాలో స్పాట్ బిట్‌కాయిన్ ఈటీఎఫ్‌లకు ఆమోదం లభించడంతో సంస్థాగత పెట్టుబడులు వెల్లువెత్తాయి. ద్రవ్యోల్బణానికి విరుగుడుగా, పోర్ట్‌ఫోలియోలో వైవిధ్యం కోసం చాలామంది దీన్ని "డిజిటల్ బంగారం"గా చూస్తున్నారు.

భార‌తీయుల‌ను ఆక‌ర్షించిన బిట్‌కాయిన్‌
భారత్‌లోనూ ఈ మార్పు స్పష్టంగా కనిపిస్తోంది. ఒకప్పుడు కేవలం ట్రేడర్లు మాత్రమే ఆసక్తి చూపేవారు. కానీ ఇప్పుడు నిపుణులు, యువ ఉద్యోగులు దీర్ఘకాలిక పెట్టుబడిగా భావిస్తున్నారు. మడ్రెక్స్ అంచనాల ప్రకారం ప్రపంచంలోని మొత్తం బిట్‌కాయిన్లలో దాదాపు 5% భారతీయ ఇన్వెస్టర్ల వద్దే ఉన్నాయి. "పిజ్జా నుంచి పోర్ట్‌ఫోలియో వరకు, బిట్‌కాయిన్ భారతీయుల ఆలోచనలను, పర్సులను ఆకర్షించింది" అని బిట్‌డెల్టా ఇండియా సీఈఓ వికాస్ ఎం సచ్‌దేవా వ్యాఖ్యానించారు.

బిట్‌కాయిన్‌లో పెట్టుబడి ఇప్పటికీ రిస్కే
అయితే, బిట్‌కాయిన్‌లో పెట్టుబడి పెట్టడం ఇప్పటికీ రిస్క్‌తో కూడుకున్నదే. గతంలో ఇది ఎన్నోసార్లు కుప్పకూలింది. అయినప్పటికీ ప్రతిసారీ పుంజుకుంది. అందుకే నిపుణులు పూర్తి అవగాహనతో తమ పోర్ట్‌ఫోలియోలో చిన్న భాగంగా మాత్రమే క్రిప్టోలో పెట్టుబడి పెట్టాలని సూచిస్తున్నారు. ఆకలితో ఉన్న ఒక ప్రోగ్రామర్ ఇంటర్నెట్ డబ్బుతో భోజనం కొనడం, తెలియకుండానే ఆర్థిక చరిత్రను మార్చడం.. ఈ కథ టెక్నాలజీ ప్రపంచాన్ని ఎంత వేగంగా మార్చగలదో గుర్తుచేస్తూనే ఉంటుంది.