అతడ్ని సచిన్ వారసుడు అనకండి: దినేశ్ కార్తీక్

భారత మాజీ వికెట్ కీపర్, బ్యాటర్ దినేశ్ కార్తీక్.. 15 ఏళ్ల యువ సంచలనం వైభవ్ సూర్యవంశీని దిగ్గజ క్రికెటర్ సచిన్ టెండూల్కర్‌తో పోల్చవద్దని సూచించాడు. అద్భుత ప్రతిభ కనబరుస్తున్న ఆ కుర్రాడిపై అనవసరమైన పోలికలతో భారం మోపవద్దని, అతడికి ఎదురయ్యే సవాళ్లు విలక్షణంగా ఉంటాయని హితవు పలికాడు. సచిన్ వారసుడ అతడే అనడం ఏమంత సమంజసం కాదని అభిప్రాయపడ్డాడు.

ఐపీఎల్ 2026 సీజన్‌లో రాజస్థాన్ రాయల్స్ తరఫున ఆడుతున్న లెఫ్ట్ హ్యాండ్ ఓపెనర్ వైభవ్ సూర్యవంశీ, ఇప్పటివరకు 13 మ్యాచ్‌లలో 579 పరుగులు చేసి టాప్ స్కోరర్‌గా నిలిచాడు. ముఖ్యంగా, 236.32 స్ట్రైక్ రేట్‌తో విధ్వంసకర బ్యాటింగ్ చేస్తూ అందరి దృష్టిని ఆకర్షిస్తున్నాడు.

ఈ నేపథ్యంలో ఐకూ క్వెస్ట్ టాక్ పాడ్‌కాస్ట్‌లో కార్తీక్ మాట్లాడుతూ, "వైభవ్ బ్యాటింగ్ ప్రదర్శన చాలా ప్రత్యేకం. కానీ ప్రజలు అతడిని 'సచిన్ వారసుడు' అని ట్యాగ్ చేయొద్దని కోరుకుంటున్నాను. సచిన్ సాధించింది అసాధారణం. వైభవ్‌కు ఎదురయ్యే సవాళ్లు పూర్తిగా భిన్నంగా ఉంటాయి. సచిన్‌కు మైదానంలో, బయట సవాళ్లు ఎదురైతే, వైభవ్‌కు మాత్రం మైదానం బయటే ఎక్కువ సవాళ్లు ఉంటాయి. ఎందుకంటే అతడికి అద్భుతమైన క్రికెట్ నైపుణ్యాలు ఉన్నాయి, కానీ క్రీడకు సంబంధం లేని బయటి విషయాలను ఎదుర్కోవాల్సి ఉంటుంది" అని వివరించాడు.

ఇదే సందర్భంగా ఐపీఎల్ ప్రస్థానం గురించి కూడా కార్తీక్ మాట్లాడాడు. "2008లో ప్రారంభమైన ఐపీఎల్‌కు, ఇప్పటికి చాలా తేడా ఉంది. డేటా, గణాంకాల వాడకం విపరీతంగా పెరిగింది. ఇది ఎందరికో జీవనశైలిని అందిస్తూ, యువ క్రీడాకారులకు బలమైన కెరీర్ ఆప్షన్‌గా మారింది. అతి తక్కువ కాలంలోనే ప్రపంచంలోని ఇతర క్రీడా టోర్నమెంట్‌లతో పోటీ పడుతోంది" అని అన్నాడు.

ప్రస్తుతం దినేశ్ కార్తీక్, డిఫెండింగ్ ఛాంపియన్ రాయల్ ఛాలెంజర్స్ బెంగళూరుకు బ్యాటింగ్ కోచ్, మెంటార్‌గా వ్యవహరిస్తున్నాడు. తాను ఇప్పుడు ఈ స్థాయిలో ఉన్నానంటే అది ఆర్సీబీ వల్లేనని డీకే వినమ్రంగా తెలిపాడు.