మెట్రోలో సాధారణ ప్రయాణికుడిలా తెలంగాణ బీజేపీ చీఫ్ రాంచందర్ రావు
- ప్రజా రవాణా వినియోగంపై అవగాహన కల్పించేందుకు మెట్రోలో పయనం
- ఇంధన పొదుపు, పర్యావరణ పరిరక్షణలో ప్రతి పౌరుడు భాగస్వామి కావాలని విన్నపం
- ఎలక్ట్రిక్ వాహనాలను ప్రోత్సహించాలని పిలుపు
బీజేపీ తెలంగాణ రాష్ట్ర అధ్యక్షుడు రాంచందర్ రావు హైదరాబాద్ మెట్రోలో సాధారణ ప్రయాణికుడిలా ప్రయాణించి అందరినీ ఆశ్చర్యపరిచారు. ప్రధాని నరేంద్ర మోదీ పిలుపు మేరకు, ప్రజా రవాణా వినియోగంపై అవగాహన కల్పించేందుకు ఆయన తార్నాక నుంచి జూబ్లీహిల్స్ వరకు మెట్రోలో ప్రయాణించారు.
ఈ సందర్భంగా ఆయన మీడియాతో మాట్లాడుతూ... ఇంధన పొదుపు, పర్యావరణ పరిరక్షణలో ప్రతి పౌరుడు భాగస్వామి కావాలని కోరారు. వ్యక్తిగత కార్ల వాడకాన్ని తగ్గించి, మెట్రో, బస్సుల వంటి ప్రజా రవాణా వ్యవస్థలను ఉపయోగించడం ద్వారా దేశంపై పడే ఆర్థిక భారాన్ని (ఇంధన దిగుమతులు) తగ్గించవచ్చని ఆయన పేర్కొన్నారు. పెట్రోల్, డీజిల్ వినియోగం తగ్గించి, ఎలక్ట్రిక్ వాహనాలను ప్రోత్సహించడం ద్వారా భావితరాలకు స్వచ్ఛమైన గాలిని అందించవచ్చని తెలిపారు.
మెట్రోలో ప్రయాణికులతో ఆప్యాయంగా ముచ్చటించిన ఆయన, ప్రధాని మోదీ 'బాధ్యతాయుత జీవన విధానం' గురించి వివరించారు. అలాగే 'వోకల్ ఫర్ లోకల్' నినాదంలో భాగంగా స్వదేశీ ఉత్పత్తులకు ప్రాధాన్యం ఇవ్వాలని ప్రజలకు విజ్ఞప్తి చేశారు. "దేశం కోసం.. భవిష్యత్తు కోసం.. మనందరి బాధ్యత" అనే సందేశాన్ని ఈ కార్యక్రమం ద్వారా చాటిచెప్పారు.
