జయలలితకు చెప్పిన జోస్యం బెడిసికొట్టినా.. విజయ్ విషయంలో నిజమైంది!

ఒకప్పుడు తమిళనాడు మాజీ ముఖ్యమంత్రి జయలలితకు అత్యంత సన్నిహితంగా మెలిగిన జ్యోతిష్యుడు, ఇప్పుడు ప్రస్తుత ముఖ్యమంత్రి విజయ్ కార్యాలయంలో కీలక అధికారిగా నియమితులయ్యారు. ఆస్తుల కేసులో జయలలిత జైలుకు వెళ్లరంటే వెళ్లరని బల్ల గుద్ది చెప్పిన రిక్కీ రాధన్ పండిట్ వెట్రివేల్.. జోస్యం తప్పడంతో 2014లో జయలలితకు దూరమయ్యారు. కొన్నాళ్లు ఢిల్లీకి మకాం మార్చారు. ఏళ్ల తర్వాత నటుడు విజయ్ రాజకీయ భవిష్యత్తుపై ఆయన చెప్పిన అంచనాలు అక్షరాలా నిజమవడంతో మళ్లీ వార్తల్లోకి ఎక్కారు. ఇప్పుడు ఏకంగా సీఎం విజయ్‌కు ఆఫీసర్ ఆన్ స్పెషల్ డ్యూటీ (ఓఎస్డీ)గా నియమితులై తమిళ రాజకీయాల్లో హాట్ టాపిక్‌గా మారారు.

సుమారు 40 ఏళ్ల అనుభవం ఉన్న జ్యోతిష్యుడు, సంఖ్యా శాస్త్రవేత్త అయిన రాధన్ పండిట్, విజయ్ రాజకీయ ప్రవేశానికి ముందే, ఎప్పుడు అడిగినా సరే విజయ్ ముఖ్యమంత్రి అవడం పక్కా అని బలంగా చెప్పేవారు. విజయ్ జాతకం "ఓ సునామీ వంటిది" అని అభివర్ణించిన ఆయన, 2026 ఎన్నికల్లో విజయ్ పార్టీ 'తమిళగ వెట్రి కళగం' (టీవీకే) 150కి పైగా సీట్లతో ఘన విజయం సాధిస్తుందని జోస్యం చెప్పారు. ఎన్నికల్లో టీవీకే అతిపెద్ద పార్టీగా అవతరించడంతో ఆయన కీర్తి ప్రతిష్ఠలు పెరిగాయి. ఈ నేపథ్యంలో, టీవీకే అధికార ప్రతినిధిగా కూడా వ్యవహరిస్తున్న రాధన్ పండిట్‌ను ముఖ్యమంత్రి విజయ్‌కు ఓఎస్డీ (పొలిటికల్)గా నియమిస్తూ ప్రభుత్వం అధికారికంగా ఉత్తర్వులు జారీ చేసింది.

డీఎంకే, ఏఐఏడీఎంకే శకం ముగిసిందని, ఎంజీఆర్ తరహాలో విజయ్ తమిళనాడు రాజకీయాల్లో దీర్ఘకాలం ఆధిపత్యం చెలాయిస్తారని రాధన్ పండిట్ బలంగా వాదిస్తున్నారు. వచ్చే 40-50 ఏళ్ల పాటు టీవీకే హవానే కొనసాగుతుందని చెబుతున్నారు. అయితే, సీఎం కార్యాలయంలో ఒక జ్యోతిష్యుడిని ఓఎస్డీగా నియమించడంపై రాజకీయంగా చర్చ మొదలైంది. టీవీకే మిత్రపక్షమైన కాంగ్రెస్ పార్టీ ఎంపీ శశికాంత్ సెంథిల్, "ఒక జ్యోతిష్యుడికి ఓఎస్డీ పదవి ఎందుకు?" అని సోషల్ మీడియాలో ప్రశ్నించడంతో ఈ నియామకంపై వివాదం మరింత పెరిగింది. ఈ నియామకం రాబోయే రోజుల్లో ఎలాంటి రాజకీయ పరిణామాలకు దారితీస్తుందోనని సర్వత్రా ఆసక్తి నెలకొంది.