బెంగాల్ టీ20 లీగ్ వేలం.. షాబాజ్‌కు అత్యధికంగా రూ. 12.2 లక్షలు

బెంగాల్ క్రికెట్‌లో తొలిసారిగా నిర్వహించిన పురుషుల టీ20 లీగ్ ప్లేయర్ల వేలం ముగిసింది. ఫ్రాంచైజీలు తమకు నచ్చిన ఆటగాళ్ల కోసం హోరాహోరీగా పోటీపడి భారీ మొత్తాలను వెచ్చించాయి. ఈ వేలంలో ఆల్‌రౌండర్ షాబాజ్ అహ్మద్ అత్యధికంగా రూ. 12.20 లక్షల ధర పలికి అందరి దృష్టిని ఆకర్షించాడు.

వేలంలో భాగంగా శ్రాచి ట్రైబ్స్ రార్ టైగర్స్ జట్టు 'రైట్ టు మ్యాచ్' (RTM) కార్డును ఉపయోగించి షాబాజ్‌ను దక్కించుకుంది. అతడి తర్వాత వికెట్ కీపర్ బ్యాటర్ అభిషేక్ పోరెల్‌ను లక్స్ శ్యామ్ కోల్‌కతా టైగర్స్ రూ. 10.40 లక్షలకు కొనుగోలు చేయగా, పేసర్ ముఖేశ్ కుమార్‌ను సోబిస్కో స్మాషర్స్ మాల్దా జట్టు రూ. 9.60 లక్షలకు (RTM) నిలబెట్టుకుంది. స్టార్ ప్లేయర్ ఆకాశ్ దీప్ ప్రస్తుతం గాయం నుంచి కోలుకుంటున్నందున, అతడు ఫిట్‌నెస్ సాధించిన తర్వాతే లీగ్‌లో పాల్గొనే అవకాశం ఉంది.

ఈ వేలంలో మొత్తం ఎనిమిది ఫ్రాంచైజీలు పాల్గొన్నాయి. అనుభవజ్ఞులైన ఆటగాళ్లతో పాటు అండర్-19, అండర్-16 విభాగాల నుంచి యువ ప్రతిభావంతులను కూడా ఫ్రాంచైజీలు ఎంచుకున్నాయి. ఈ ఏడాది నోవస్ పురూలియా రాయల్స్ జట్టు కొత్తగా లీగ్‌లో చేరింది.

ఈ కార్యక్రమంపై భారత మాజీ కెప్టెన్, క్రికెట్ అసోసియేషన్ ఆఫ్ బెంగాల్ (CAB) అధ్యక్షుడు సౌరవ్ గంగూలీ మాట్లాడుతూ.. "ఈ ఏడాది తొలిసారిగా వేలం నిర్వహించడం చాలా ఉత్సాహంగా ఉంది. దీనివల్ల జట్ల యజమానులు తమకు నచ్చిన ఆటగాళ్లను ఎంచుకునే స్వేచ్ఛ లభించింది. ఈ టోర్నమెంట్ బెంగాల్ ఆటగాళ్లకు ఎంతో ప్రయోజనకరంగా ఉంటుంది" అని తెలిపారు.