గిల్, రషీద్ మెరుపులు.. రాజస్థాన్‌పై గుజరాత్ ఘన విజయం

ఐపీఎల్ 2026లో భాగంగా జైపూర్‌లోని సవాయ్ మాన్‌సింగ్ స్టేడియంలో జరిగిన మ్యాచ్‌లో గుజరాత్ టైటాన్స్ అద్భుత ప్రదర్శనతో అదరగొట్టింది. రాజస్థాన్ రాయల్స్‌ను 77 పరుగుల భారీ తేడాతో చిత్తుగా ఓడించింది. కెప్టెన్ శుభ్‌మన్ గిల్ (84), సాయి సుదర్శన్ (55) అర్ధసెంచరీలతో గుజరాత్ 229 పరుగుల భారీ స్కోరు సాధించగా.. లక్ష్యఛేదనలో రషీద్ ఖాన్ (4/33) తన స్పిన్‌తో రాజస్థాన్‌ను కుప్పకూల్చాడు.

ఈ మ్యాచ్‌లో మొదట బ్యాటింగ్ చేసిన గుజరాత్ టైటాన్స్ నిర్ణీత 20 ఓవర్లలో 4 వికెట్ల నష్టానికి 229 పరుగులు చేసింది. ఓపెనర్లు గిల్, సాయి సుదర్శన్ అద్భుత భాగస్వామ్యం నెలకొల్పారు. వీరిద్దరూ పవర్‌ప్లేలో దూకుడుగా ఆడి రాజస్థాన్ బౌలర్లపై పూర్తి ఆధిపత్యం ప్రదర్శించారు. సుదర్శన్ ఔటైనా, గిల్ కెప్టెన్ ఇన్నింగ్స్‌తో జట్టుకు భారీ స్కోరు అందించాడు.

230 పరుగుల భారీ లక్ష్యంతో బరిలోకి దిగిన రాజస్థాన్ రాయల్స్ కూడా దూకుడుగానే ఛేదన ప్రారంభించింది. యువ ఓపెనర్ వైభవ్ సూర్యవంశీ (16 బంతుల్లో 36), ధ్రువ్ జురెల్ (10 బంతుల్లో 24) మెరుపు ఇన్నింగ్స్‌లతో చెలరేగారు. దీంతో పవర్‌ప్లే ముగిసేసరికి రాజస్థాన్ 3 వికెట్లకు 78 పరుగులతో పటిష్టంగానే కనిపించింది.

అయితే, స్పిన్నర్లు బౌలింగ్‌కు దిగడంతో మ్యాచ్ స్వరూపం పూర్తిగా మారిపోయింది. రషీద్ ఖాన్ తన మాయాజాలంతో రాజస్థాన్ బ్యాటింగ్ లైనప్‌ను దెబ్బతీశాడు. ప్రమాదకరంగా మారుతున్న జురెల్‌ను, ఆ తర్వాత ఫెరీరా, శుభమ్ దూబేలను స్వల్ప వ్యవధిలో పెవిలియన్ చేర్చాడు. చివర్లో రవీంద్ర జడేజా (38) ఒంటరి పోరాటం చేసినా ఫలితం లేకపోయింది. అనంతరం జాసన్ హోల్డర్ (3/12) మిగిలిన వికెట్లను తీయడంతో రాజస్థాన్ 16.3 ఓవర్లలో 152 పరుగులకే ఆలౌట్ అయింది.

మ్యాచ్ అనంతరం రాజస్థాన్ స్టాండ్-ఇన్ కెప్టెన్ యశస్వి జైస్వాల్ మాట్లాడుతూ, ఈ ఓటమి నుంచి పాఠాలు నేర్చుకుంటామని చెప్పాడు. తమ బౌలర్లు మంచి ప్రదర్శన ఇచ్చారని, కొన్నిసార్లు ఇలాంటి ఫలితాలు సహజమేనని అన్నాడు. ఈ విజయంతో గుజరాత్ పాయింట్ల పట్టికలో రెండో స్థానానికి ఎగబాకి  ప్లేఆఫ్ అవకాశాలను మరింత పటిష్టం చేసుకుంది.