టాస్ గెలిచిన ఆర్సీబీ.. కీలక మార్పులతో బరిలోకి లక్నో

ఐపీఎల్ 2026 సీజన్‌లో భాగంగా లక్నో సూపర్ జెయింట్స్ (ఎల్ఎస్ జీ), రాయల్ ఛాలెంజర్స్ బెంగళూరు (ఆర్సీబీ) జట్లు కీలక మ్యాచ్ లో తలపడుతున్నాయి. లక్నోలోని ఏకనా స్టేడియంలో జరుగుతున్న ఈ మ్యాచ్‌లో ఆర్సీబీ కెప్టెన్ రజత్ పటీదార్ టాస్ గెలిచి ఫీల్డింగ్ ఎంచుకున్నాడు. దీంతో రిషభ్ పంత్ సారథ్యంలోని లక్నో జట్టు మొదట బ్యాటింగ్ చేయనుంది.

ఈ సీజన్‌లో ఇరు జట్ల ప్రదర్శన పూర్తి భిన్నంగా ఉంది. ఆడిన 9 మ్యాచ్‌లలో కేవలం 2 విజయాలు సాధించి, వరుసగా ఆరు ఓటములతో లక్నో పాయింట్ల పట్టికలో అట్టడుగు స్థానంలో ఉంది. ప్లేఆఫ్స్ అవకాశాలు సన్నగిల్లడంతో ఈ మ్యాచ్‌లో గెలిచి తిరిగి పుంజుకోవాలని పట్టుదలగా ఉంది. మరోవైపు, 9 మ్యాచ్‌లలో 6 విజయాలతో ఆర్సీబీ పాయింట్ల పట్టికలో రెండో స్థానంలో ఉంది. ఈ మ్యాచ్‌లో గెలిచి ప్లేఆఫ్స్ బెర్త్‌ను మరింత సుస్థిరం చేసుకోవాలని ఆర్సీబీ చూస్తోంది.

టాస్ గెలిచిన అనంతరం ఆర్సీబీ కెప్టెన్ రజత్ పటీదార్ మాట్లాడుతూ.. "మేం మొదట బౌలింగ్ చేస్తాం. ఈ పిచ్ బాగుంది, లక్నోను తక్కువ స్కోరుకే కట్టడి చేయాలనుకుంటున్నాం. మా జట్టులో ఎలాంటి మార్పులు లేవు" అని తెలిపాడు. లక్నో కెప్టెన్ రిషభ్ పంత్ మాట్లాడుతూ.. "గాయాల కారణంగా ఇంగ్లిస్, మోసిన్ ఖాన్ దూరం కావడంతో జట్టులో కొన్ని మార్పులు చేశాం. ఈ పిచ్ 180-190 స్కోరుకు అనుకూలంగా కనిపిస్తోంది" అని పేర్కొన్నాడు.

రాయల్ ఛాలెంజర్స్ బెంగళూరు
విరాట్ కోహ్లీ, జాకబ్ బెతెల్, దేవదత్ పడిక్కల్, రజత్ పటీదార్ (కెప్టెన్), జితేశ్ శర్మ (వికెట్ కీపర్), టిమ్ డేవిడ్, రొమారియో షెపర్డ్, కృనాల్ పాండ్యా, భువనేశ్వర్ కుమార్, జోష్ హేజిల్‌వుడ్, సుయాశ్ శర్మ.
ఇంపాక్ట్ సబ్‌స్టిట్యూట్స్: రసిఖ్ దార్, జోర్డాన్ కాక్స్, మంగేష్ యాదవ్, విక్కీ ఓస్త్వాల్, వెంకటేశ్ అయ్యర్.

లక్నో సూపర్ జెయింట్స్ 
మిచెల్ మార్ష్, అర్షిన్ కులకర్ణి, నికోలస్ పూరన్, ఐడెన్ మార్క్‌రమ్, రిషభ్ పంత్ (కెప్టెన్/వికెట్ కీపర్), అక్షత్ రఘువంశీ, హిమ్మత్ సింగ్, షాబాజ్ అహ్మద్, దిగ్వేశ్ సింగ్ రాఠీ, మహమ్మద్ షమీ, ప్రిన్స్ యాదవ్.
ఇంపాక్ట్ సబ్‌స్టిట్యూట్స్: మయాంక్ యాదవ్, ముకుల్ చౌధరి, అబ్దుల్ సమద్, ఎం సిద్ధార్థ్, అవేష్ ఖాన్.