ఐపీఎల్ లో బుమ్రా ఘోర వైఫల్యాలకు కారణమేంటో చెప్పిన రవిశాస్త్రి!

టీమిండియా స్టార్ పేసర్ జస్ప్రీత్ బుమ్రా ఐపీఎల్ 2026లో పేలవ ఫామ్‌తో ఇబ్బంది పడటంపై భారత మాజీ కోచ్ రవిశాస్త్రి తీవ్ర ఆందోళన వ్యక్తం చేశాడు. బుమ్రా ప్రదర్శన క్షీణించడానికి శారీరక శ్రమతో పాటు మానసిక అలసట కూడా ప్రధాన కారణమని అభిప్రాయపడ్డాడు. రానున్న అంతర్జాతీయ షెడ్యూల్ దృష్ట్యా ముంబై ఇండియన్స్ జట్టులో బుమ్రా పనిభారాన్ని జాగ్రత్తగా నిర్వహించాలని సూచించాడు.

జియోహాట్‌స్టార్‌లో జరిగిన ఒక చర్చా కార్యక్రమంలో శాస్త్రి మాట్లాడుతూ, "గత 12 నెలలుగా భారత జట్టుతో బుమ్రాకు విపరీతమైన పనిభారం ఉంది. అతని ఇబ్బందులు శారీరకమైనవి మాత్రమే కాదు, మానసిక అలసట కూడా ఒక పెద్ద కారణం. ముంబై ఇండియన్స్ అతడిని జాగ్రత్తగా చూసుకోవాలి. రాబోయే రెండేళ్లలో వరుసగా టెస్ట్ సిరీస్‌లు, 50 ఓవర్ల ప్రపంచ కప్ ఉన్నాయి. కాబట్టి అతని ఫిట్‌నెస్, వర్క్ లోడ్ మెయింటెనెన్స్ జాగ్రత్తగా నిర్వహించాలి" అని స్పష్టం చేశాడు.

ఈ సీజన్‌లో బుమ్రా గణాంకాలు చూస్తే శాస్త్రి ఆందోళనలో అర్థం కనిపిస్తుంది. ప్రపంచంలోని అత్యంత నమ్మకమైన బౌలర్లలో ఒకడైన బుమ్రా, ఈ ఐపీఎల్‌లో ఇప్పటివరకు 10 మ్యాచ్‌లు ఆడి కేవలం 3 వికెట్లు మాత్రమే పడగొట్టాడు. ఒక దశలో వరుసగా ఐదు మ్యాచ్‌ల్లో ఒక్క వికెట్ కూడా తీయలేకపోయాడు. పొదుపుగా బౌలింగ్ చేస్తున్నప్పటికీ, వికెట్లు తీయడంలో మాత్రం విఫలమవుతున్నాడు. గుజరాత్ టైటాన్స్‌తో జరిగిన మ్యాచ్‌లో వికెట్ తీసి ఫామ్‌లోకి వస్తున్నాడనిపించినా, ఆ తర్వాత మళ్లీ తేలిపోయాడు.

టెస్టులు, వన్డేలు, టీ20లు ఇలా మూడు ఫార్మాట్లలో భారత జట్టుకు బుమ్రా చాలా కీలకం. ఈ నేపథ్యంలో కీలక టోర్నీలకు ముందు అతనిని కాపాడుకోవడం జట్టుకు ఎంతో అవసరమని క్రీడా విశ్లేషకులు భావిస్తున్నారు.