ఇందిరాగాంధీ రికార్డును సమం చేసిన బీజేపీ.. రెండోసారి అరుదైన ఘనత

భారత రాజకీయాల్లో బీజేపీ నేతృత్వంలోని ఎన్డీఏ కూటమి మరోసారి తన ఆధిపత్యాన్ని ప్రదర్శించింది. మే 4న పశ్చిమ బెంగాల్, అసోం రాష్ట్రాల్లో ఘన విజయాలు సాధించడంతో దేశవ్యాప్తంగా ఎన్డీఏ పాలిత రాష్ట్రాలు, కేంద్ర పాలిత ప్రాంతాల సంఖ్య 21కి చేరింది. ఇది బీజేపీకి ఒక చారిత్రక మైలురాయి. 2018లో సాధించిన రికార్డును మళ్లీ అందుకోవడమే కాకుండా, 1970ల చివరలో ఇందిరా గాంధీ హయాంలో కాంగ్రెస్ నెలకొల్పిన రికార్డును కూడా సమం చేసింది.

2014లో నరేంద్ర మోదీ ప్రధాని అయినప్పుడు బీజేపీ కేవలం 7 రాష్ట్రాల్లో అధికారంలో ఉంది. పక్కా వ్యూహాలు, సంస్థాగత పటిష్ఠత, బలమైన పొత్తులతో 2018 మార్చి నాటికి ఈ సంఖ్యను 21కి పెంచుకుంది. అయితే, ఆ ఆధిపత్యం ఎక్కువ కాలం నిలవలేదు. 2018 డిసెంబర్‌లో మధ్యప్రదేశ్, రాజస్థాన్, ఛత్తీస్‌గఢ్‌లలో ఓటమితో ఎన్డీఏ పాలిత రాష్ట్రాల సంఖ్య వేగంగా తగ్గింది. ఒకానొక దశలో 13 రాష్ట్రాలకు పడిపోయింది.

2024 లోక్‌సభ ఎన్నికల్లో బీజేపీ సొంతంగా మెజారిటీ కోల్పోవడం (240 సీట్లు) కమలదళానికి పెద్ద ఎదురుదెబ్బగా భావించారు. ఇక రాష్ట్రాల్లోనూ బీజేపీ క్షీణత మొదలవుతుందని విశ్లేషకులు అంచనా వేశారు. కానీ, దానికి భిన్నంగా జరిగింది. హోంమంత్రి అమిత్ షా, పార్టీ మాజీ అధ్యక్షుడు జేపీ నడ్డా తెరవెనుక వ్యూహరచనతో పార్టీ యంత్రాంగాన్ని తిరిగి గాడిలో పెట్టారు.

2024 తర్వాత మహారాష్ట్ర, హర్యానా, బిహార్, ఒడిశా వంటి కీలక రాష్ట్రాలను ఎన్డీఏ తిరిగి కైవసం చేసుకుంది. తాజాగా అసోంలో హిమంత బిశ్వ శర్మ రెండోసారి అధికారం నిలబెట్టుకోవడం, పశ్చిమ బెంగాల్‌లో టీఎంసీని ఓడించడంతో ఎన్డీఏ మళ్లీ తన శిఖరాగ్ర స్థాయికి చేరింది. దీంతో గంగోత్రి నుంచి గంగాసాగర్ వరకు గంగానది ప్రవహించే అన్ని రాష్ట్రాలు (ఉత్తరాఖండ్, యూపీ, బిహార్, బెంగాల్) ఎన్డీఏ పాలన కిందకు వచ్చినట్లయింది. ఈ విజయాలతో దేశ జనాభాలో సుమారు 72 శాతం మంది ఇప్పుడు ఎన్డీఏ పాలనలో ఉన్న రాష్ట్రాల్లోనే నివసిస్తున్నారు. 2024 ఫలితాలను ఒక మేల్కొలుపుగా తీసుకుని, రాష్ట్రాల్లో పార్టీని బలోపేతం చేయడంలో బీజేపీ అద్భుతమైన పునరాగమనం చేసిందని ఈ ఫలితాలు స్పష్టం చేస్తున్నాయి.