తొలి అడుగులోనే ప్రభంజనం.. విజయ్ నివాసంలో వెల్లువెత్తిన సంబరాలు.. ఇదిగో వీడియో!

వెండితెరపై దశాబ్దాలుగా బ్లాక్‌బస్టర్లు అందించిన ప్రముఖ నటుడు 'ద‌ళ‌పతి' విజయ్, ఇప్పుడు నిజ జీవిత రాజకీయాల్లోనూ తొలి బ్లాక్‌బస్టర్ దిశగా దూసుకెళుతున్నారు. నేడు జరుగుతున్న తమిళనాడు అసెంబ్లీ ఎన్నికల ఓట్ల లెక్కింపులో ఆయన స్థాపించిన తమిళగ వెట్రి కళగం (టీవీకే) సంచలన ప్రదర్శన కనబరుస్తోంది. తొలి ట్రెండ్స్‌లోనే అధికార, ప్రతిపక్ష కూటములను వెనక్కి నెట్టి అత్యధిక స్థానాల్లో ఆధిక్యంలో నిలవడం తమిళ రాజకీయాల్లో ప్రకంపనలు సృష్టిస్తోంది.

ఓట్ల లెక్కింపు ప్రారంభమైన రెండు గంటల్లోనే రాష్ట్రంలోని మొత్తం 234 స్థానాలకు గాను టీవీకే 106 స్థానాల్లో ఆధిక్యంలో నిలిచింది. ఏఐఏడీఎంకే నేతృత్వంలోని కూటమి 71 స్థానాల్లో రెండో స్థానంలో ఉండగా, అధికార డీఎంకే, కాంగ్రెస్, డీఎండీకేలతో కూడిన కూటమి 56 స్థానాలతో మూడో స్థానానికి పరిమితమైంది. ఈ ఫలితాలు వెలువడిన వెంటనే విజయ్ నివాసంలో సంబరాలు అంబరాన్నంటాయి. ఆయన కుటుంబ సభ్యులు, తండ్రితో కలిసి ఆనందంతో ఉప్పొంగిపోతున్న వీడియో సోషల్ మీడియాలో వైరల్‌గా మారింది. అభిమానులు, కార్యకర్తలు భారీగా తరలివచ్చే అవకాశం ఉండటంతో పోలీసులు విజయ్ ఇంటి వద్ద భద్రతను కట్టుదిట్టం చేశారు.

టీవీకే అనూహ్య ఆధిక్యంతో ఎన్నికల అనంతర పొత్తులపై చర్చలు మొదలయ్యాయి. ఎన్నికలకు ముందు ఏఐఏడీఎంకేతో పొత్తు ఉండదని ఇరు పార్టీలు స్పష్టం చేసినప్పటికీ, మారిన సమీకరణాల నేపథ్యంలో ప్రభుత్వ ఏర్పాటుకు అవకాశాలు ఎలా ఉంటాయనేది ఆసక్తికరంగా మారింది. ఈ ఫలితాలపై టీవీకే నేత ఫెలిక్స్ గెరాల్డ్ మాట్లాడుతూ... "మేం గెలుస్తామని ధీమాగా ఉన్నాం. ఈ ఫలితాలను ముందే ఊహించాం. తమిళనాడు ప్రజలు మార్పు కోరుకున్నారు. డీఎంకే, ఏఐఏడీఎంకే పాలనతో వారు విసిగిపోయారు" అని వ్యాఖ్యానించారు.

ఎంజీఆర్, జయలలిత వంటి నటులు రాజకీయాల్లో రాణించడం తమిళనాడుకు కొత్త కాకపోయినా, విజయ్ ప్రవేశం భిన్నమైనది. ఆయన జాతీయ పార్టీలతో కాకుండా దశాబ్దాలుగా పాతుకుపోయిన రెండు బలమైన ద్రావిడ పార్టీలను ఏకకాలంలో ఢీకొట్టి ఆధిక్యం సాధించడం గమనార్హం. అయితే, ఈ రాజకీయ ప్రయాణంలో విజయ్ అనేక సవాళ్లను ఎదుర్కొన్నారు. కరూర్ సభలో జరిగిన తొక్కిసలాట, రాజకీయాల కోసం తన చివరి చిత్రంగా భావిస్తున్న 'జన నాయగన్' సినిమాపై జరిగిన చర్చ వంటివి ఆయన ప్రచారంపై ప్రభావం చూపినా, ప్రజలు మాత్రం ఆయనకే పట్టం కడుతున్నట్లు తొలి ట్రెండ్స్ స్పష్టం చేస్తున్నాయి.