కెనడా షోలో దిల్జీత్‌కు ఖలిస్థానీ సెగ.. ప్రదర్శన ఆపి స్ట్రాంగ్ వార్నింగ్

ప్రముఖ పంజాబీ గాయకుడు, నటుడు దిల్జీత్ దోసాంజ్‌కు కెనడాలో చేదు అనుభవం ఎదురైంది. తన 'ఆరా టూర్'లో భాగంగా కెనడాలోని కాల్గరీలో నిర్వహిస్తున్న సంగీత కచేరీలో కొందరు ప్రేక్షకులు ఖలిస్థాన్ అనుకూల జెండాలు ప్రదర్శించడంతో ఆయన తీవ్ర ఆగ్రహం వ్యక్తం చేశారు. ప్రదర్శనను మధ్యలోనే ఆపి, జెండాలు ఊపుతున్న వారిని ఉద్దేశించి ఘాటుగా స్పందించాడు. ఈ ఘటనకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.

షో జరుగుతుండగా కొందరు ఖలిస్థాన్ జెండాలు ఊపడం గమనించిన దిల్జీత్ వెంటనే పాట ఆపేశాడు. నిర్వాహకులను పిలిచి, ఆ వ్యక్తులను వేదిక నుంచి బయటకు పంపాలని ఆదేశించాడు. అనంతరం ఆయన మాట్లాడుతూ.. తనపై వస్తున్న విమర్శలకు సమాధానమిచ్చాడు. "నేను ఏ వేదికపైకి వెళ్లినా పంజాబ్ గురించి, దాని సమస్యల గురించే మాట్లాడతాను. గతేడాది 'కౌన్ బనేగా కరోడ్‌పతి' (కేబీసీ) షోకు వెళ్ళింది కూడా పంజాబ్ కోసమే. జాతీయ మీడియా పంజాబ్ గురించి మాట్లాడటం లేదంటారు, అందుకే నేను అక్కడికి వెళ్లి పంజాబ్ సమస్యలను ప్రస్తావించాను" అని స్పష్టం చేశాడు.

"నేను టీవీలో ఒకరి పక్కన కూర్చున్నానని మీకు ఇంకా సమస్య ఉంటే, మీకు ఎన్ని జెండాలు చూపించాలనుకుంటే అన్ని చూపించుకోండి" అంటూ తీవ్ర స్వరంతో హెచ్చరించాడు. తాను 'ది టునైట్ షో విత్ జిమ్మీ ఫాలన్'లో పాల్గొన్నప్పుడు కూడా 1914 నాటి 'కొమగట మారు' ఘటనను ప్రస్తావించి, పంజాబ్‌కు ప్రపంచవ్యాప్త గుర్తింపు తీసుకురావడానికే ప్రయత్నించానని తెలిపాడు. దిల్జీత్ వ్యాఖ్యలకు అక్కడున్న ప్రేక్షకుల నుంచి పెద్ద ఎత్తున హర్షధ్వానాలు వ్యక్తమయ్యాయి. 

ఇక సినిమాల విషయానికొస్తే, దిల్జీత్ దోసాంజ్ త్వరలో ఇంతియాజ్ అలీ దర్శకత్వంలో 'మై వాపస్ ఆవూంగా' చిత్రంలో కనిపించనున్నాడు. ఈ సినిమా జూన్ 12న థియేటర్లలో విడుదల కానుంది.