ఉప్పల్‌లో ఉసూరుమనిపించిన సన్‌రైజర్స్... కోల్‌కతా ముందు ఈజీ టార్గెట్!

గత కొన్ని మ్యాచ్‌లలో 200 పరుగుల మార్కును అవలీలగా దాటుతూ విధ్వంసం సృష్టించిన సన్‌రైజర్స్ హైదరాబాద్ జట్టు, సొంతగడ్డపై అభిమానులను తీవ్రంగా నిరాశపరిచింది. కోల్‌కతా నైట్‌రైడర్స్‌తో జరిగిన మ్యాచ్‌లో పూర్తి ఓవర్లు కూడా ఆడకుండా 19 ఓవర్లలో 165 పరుగులకే ఆలౌట్ అయింది. ట్రావిస్ హెడ్, ఇషాన్ కిషన్ మినహా మిగతా బ్యాటర్లు విఫలం కావడంతో రైజర్స్ తక్కువ స్కోరుకే పరిమితమైంది.

టాస్ గెలిచి బ్యాటింగ్ ఎంచుకున్న హైదరాబాద్‌కు శుభారంభం లభించింది. ఓపెనర్ ట్రావిస్ హెడ్ (61; 28 బంతుల్లో 9 ఫోర్లు, 3 సిక్సర్లు) తన ఫామ్‌ను కొనసాగిస్తూ మరో మెరుపు ఇన్నింగ్స్ ఆడాడు. అయితే, మరో ఓపెనర్ అభిషేక్ శర్మ (15) త్వరగానే వెనుదిరిగాడు. అనంతరం క్రీజులోకి వచ్చిన ఇషాన్ కిషన్ (42; 29 బంతుల్లో 4 ఫోర్లు, 2 సిక్సర్లు) హెడ్‌తో కలిసి స్కోరు బోర్డును పరుగులు పెట్టించాడు.

అయితే, హెడ్ ఔటైన తర్వాత హైదరాబాద్ ఇన్నింగ్స్ ఒక్కసారిగా కుప్పకూలింది. హెన్రిచ్ క్లాసెన్ (11) సహా మిడిలార్డర్ బ్యాటర్లు పూర్తిగా చేతులెత్తేశారు. క్రీజులోకి వచ్చినవారు వచ్చినట్టే పెవిలియన్‌కు క్యూ కట్టారు. కోల్‌కతా బౌలర్లు కట్టుదిట్టంగా బంతులేసి వరుస విరామాల్లో వికెట్లు పడగొట్టారు. కేకేఆర్ బౌలర్లలో వరుణ్ చక్రవర్తి మూడు వికెట్లు తీయగా, సునీల్ నరైన్, కార్తీక్ త్యాగి చెరో రెండు వికెట్లు సాధించారు. దీంతో ప్యాట్ కమిన్స్ సేన ప్రత్యర్థి ముందు ఓ మోస్తరు లక్ష్యాన్ని మాత్రమే ఉంచగలిగింది.