టీ20 క్రికెట్‌లో ముంబై ఇండియన్స్ ప్రపంచ రికార్డు

ఐపీఎల్‌లో ముంబై ఇండియన్స్ ఒకే మ్యాచ్‌లో అరుదైన రికార్డు, ఘోర పరాజయం రెండింటినీ చవిచూసింది. చెన్నై సూపర్ కింగ్స్‌తో శనివారం జరిగిన మ్యాచ్‌లో ఓటమి పాలైనప్పటికీ, టీ20 క్రికెట్ చరిత్రలోనే 50,000 పరుగులు పూర్తి చేసిన తొలి జట్టుగా ప్రపంచ రికార్డు సృష్టించింది. 286వ మ్యాచ్‌లో ముంబై ఈ ఘనత సాధించింది. అయితే, ఈ రికార్డు ఆనందం మ్యాచ్ ఫలితం ముందు చిన్నబోయింది.

చెపాక్ స్టేడియం వేదికగా జరిగిన ఈ మ్యాచ్‌లో చెన్నై 8 వికెట్ల తేడాతో ఘన విజయం సాధించింది. టాస్ గెలిచి మొదట బ్యాటింగ్ చేసిన ముంబై ఇండియన్స్ నిర్ణీత 20 ఓవర్లలో 7 వికెట్ల నష్టానికి 159 పరుగులు మాత్రమే చేయగలిగింది. అనంతరం, లక్ష్య ఛేదనలో చెన్నై 18.1 ఓవర్లలో కేవలం 2 వికెట్లు కోల్పోయి 160 పరుగులు చేసి సునాయాసంగా గెలిచింది. కెప్టెన్ రుతురాజ్ గైక్వాడ్ (67*), కార్తీక్ శర్మ (54*) అజేయ హాఫ్ సెంచరీలతో జట్టును విజయతీరాలకు చేర్చారు.

ఈ మ్యాచ్ ప్రారంభానికి ముందు ముంబై 50,000 పరుగుల మైలురాయికి 114 పరుగుల దూరంలో ఉంది. తమ ఇన్నింగ్స్‌లోని 15వ ఓవర్లో ఈ ఘనతను అందుకుంది. ఇన్నింగ్స్ ముగిసేసరికి ముంబై మొత్తం స్కోరు 50,003 పరుగులకు చేరింది. అయితే, బ్యాటింగ్‌లో నమన్ ధీర్ (57) ఒంటరి పోరాటం చేసినా, కెప్టెన్ హార్దిక్ పాండ్యా (18) సహా మిగతా బ్యాటర్లు విఫలమయ్యారు. చెన్నై బౌలర్లలో అన్షుల్ కంబోజ్ 3 వికెట్లతో సత్తా చాటాడు.

ఈ విజయంతో చెన్నై ఈ సీజన్‌లో ముంబైపై రెండోసారి గెలిచినట్లయింది. మరోవైపు, ఈ ఓటమితో ముంబై ఇండియన్స్ ప్లేఆఫ్ అవకాశాలు దాదాపుగా ముగిసిపోయాయి.

కాగా, టీ 20ల్లో 50 వేల పరుగులు సాధించిన ముంబై తర్వాతి స్థానంలో ఇంగ్లిష్ కౌంటీ జట్టు అయిన సోమర్‌సెట్ ఉంది. ఈ జట్టు 303 మ్యాచుల్లో 48,244 పరుగులు సాధించింది. ఇక, ఐపీఎల్‌లో  రాయల్ చాలెంజర్స్ బెంగళూరు (ఆర్సీబీ) మూడో స్థానంలో ఉంది. ఆ జట్టు 295 మ్యాచుల్లో 47,304 పరుగులు సాధించింది.