గాయంతో పాటు మరో కారణం.. ధోనీ మ్యాచ్‌లకు రాకపోవడం వెనుక పెద్ద కథే ఉంది!

ఐపీఎల్ 2026 సీజన్‌లో చెన్నై సూపర్ కింగ్స్ ఆడుతున్న మ్యాచ్‌లకు ఆ జట్టు మాజీ కెప్టెన్, దిగ్గజ ఆటగాడు మహేంద్ర సింగ్ ధోనీ ఎందుకు హాజరు కావడం లేదనే సస్పెన్స్‌కు తెరపడింది. ప్రస్తుతం పిక్క గాయం నుంచి కోలుకుంటున్న ధోనీ, ప్రాక్టీస్ సెషన్లలో కనిపిస్తున్నప్పటికీ.. మ్యాచ్‌ల రోజున మాత్రం స్టేడియంలో ఎక్కడా కనిపించడం లేదు. దీని వెనుక ఉన్న అసలు కారణాన్ని సీఎస్‌కే బ్యాటింగ్ కోచ్ మైఖేల్ హస్సీ వెల్లడించాడు. జట్టు ప్రయోజనాలను దృష్టిలో ఉంచుకునే ధోనీ ఈ నిర్ణయం తీసుకున్నాడని ఆయన స్పష్టం చేశాడు.

ఇవాళ్టి ముంబై ఇండియన్స్‌తో మ్యాచ్‌కు ముందు హస్సీ మాట్లాడుతూ... "ధోనీ ఎప్పుడూ జట్టు గురించే ఆలోచిస్తాడు. జట్టు ప్రయోజనాలకే అతను పెద్దపీట వేస్తాడు. తాను స్టేడియానికి వస్తే, అది జట్టుకు ఒకరకమైన డిస్ట్రాక్షన్ అవుతుందని అతను ఆందోళన చెందాడు. తాను వస్తే కెమెరాలన్నీ తనపైనే ఉంటాయని, అభిమానుల దృష్టి కూడా ఆటగాళ్ల ప్రదర్శనపై కాకుండా తనవైపే మళ్లుతుందని ధోనీ భావించాడు. అందుకే జట్టు ఎలాంటి ఆటంకాలు లేకుండా తమ పని తాము చేసుకునేలా ఉండేందుకే మ్యాచ్‌లకు దూరంగా ఉండాలని నిర్ణయించుకున్నాడు" అని వివరించాడు. ఈ నిర్ణయం సరైనదా? కాదా? అని చెప్పేది తాను కాదని, కానీ ధోనీ ఆలోచన మాత్రం ఇదేనని హస్సీ తెలిపాడు.

అయితే, ధోనీ మ్యాచ్‌లకు దూరంగా ఉన్నా.. ఇంటి నుంచే ప్రతీ మ్యాచ్‌ను నిశితంగా గమనిస్తున్నాడని హస్సీ అన్నాడు. "అతను ఇంటి దగ్గర ఉండి మ్యాచ్‌లను చాలా క్షుణ్ణంగా చూస్తున్నాడు. నిజానికి ధోనీ డ్రెస్సింగ్ రూమ్‌లో ఉండటం నాకిష్టం. అతని జ్ఞానం, అనుభవం ఆటగాళ్లలో ఎంతో ఆత్మవిశ్వాసాన్ని నింపుతుంది. ట్రైనింగ్‌లో ఎప్పుడూ చురుకుగా ఉంటూ తన అనుభవాన్ని ఆటగాళ్లతో పంచుకుంటున్నాడు. కేవలం జట్టు ఏకాగ్రత దెబ్బతినకూడదనే సదుద్దేశంతోనే అతను మ్యాచ్‌ల రోజున దూరంగా ఉంటున్నాడు" అని హస్సీ పేర్కొన్నాడు.

పిక్క గాయం కారణంగా ధోనీ ఈ సీజన్‌లో ఇప్పటివరకు ఒక్క మ్యాచ్ కూడా ఆడలేదు. నెట్స్‌లో బాగానే బ్యాటింగ్ చేస్తున్నా, డెత్ ఓవర్లలో వేగంగా పరుగెత్తాల్సి రావడం వల్ల పూర్తి ఫిట్‌నెస్ సాధించే వరకు వేచి చూస్తున్నాడు. ప్రస్తుతం చెన్నై సూపర్ కింగ్స్ ఆరు పాయింట్లతో పట్టికలో ఆరో స్థానంలో కొనసాగుతోంది.