ఏపీ ఆహార భద్రత ప్రధాన కార్యాలయంలో నలుగురిపై వేటు

ఆంధ్రప్రదేశ్ రాజధాని అమరావతిలోని ఆహార భద్రత ప్రధాన కార్యాలయంలో విధుల పట్ల తీవ్ర నిర్లక్ష్యంగా వ్యవహరించిన నలుగురు ఉద్యోగులపై ప్రభుత్వం వేటు వేసింది. సూపరింటెండెంట్ సహా ముగ్గురు సీనియర్ అసిస్టెంట్లను సస్పెండ్ చేస్తూ ఆరోగ్య, కుటుంబ సంక్షేమ శాఖ కమిషనర్ జి. వీరపాండ్యన్ ఉత్తర్వులు జారీ చేశారు.

సస్పెన్షన్‌కు గురైన వారిలో ఇన్‌స్టిట్యూట్ ఆఫ్ ప్రివెంటివ్ మెడిసిన్ (ఫుడ్ సేఫ్టీ విభాగం) సూపరింటెండెంట్ డి. శిరీష, సీనియర్ అసిస్టెంట్లు జి. అఖిల్, సంగీత రావు, జె. సుజాత ఉన్నారు. అనధికారికంగా సెలవుపై వెళ్లడం, పదవీ విరమణ చేసిన ఉద్యోగికి ఆర్థిక ప్రయోజనాల చెల్లింపులో జాప్యం చేయడం వంటి కారణాలతో జె. సుజాతపై చర్యలు తీసుకున్నారు. మిగిలిన ముగ్గురు ఉన్నతాధికారుల ఆదేశాలను పాటించకపోవడం, పలుమార్లు హెచ్చరించినప్పటికీ పనితీరులో మార్పు రాకపోవడంతో వారిని సస్పెండ్ చేసినట్లు ఉత్తర్వుల్లో స్పష్టం చేశారు.

గతంలో ఈ నలుగురు ఉద్యోగుల పనితీరుపై రాష్ట్ర వైద్య, ఆరోగ్య శాఖ మంత్రి వై. సత్యకుమార్‌కు పలు ఫిర్యాదులు అందాయి. దీనిపై స్పందించిన మంత్రి, వెంటనే విచారణకు ఆదేశించారు. విచారణ కమిటీ సమర్పించిన నివేదిక ఆధారంగా ప్రభుత్వం ఈ సస్పెన్షన్ చర్యలు చేపట్టింది. విధి నిర్వహణలో అలసత్వం ప్రదర్శిస్తే కఠిన చర్యలు తప్పవని ఈ సందర్భంగా కమిషనర్ వీరపాండ్యన్ హెచ్చరించారు.