వేపింగ్ వివాదం ప్రభావమే లేదు... ఢిల్లీ బౌలర్లను చీల్చిచెండాడిన రియాన్ పరాగ్!

 గత మ్యాచ్ సమయంలో డ్రెస్సింగ్ రూంలో వేపింగ్ (ఈ-సిగరెట్) చేస్తూ దొరికిపోయిన రాజస్థాన్ రాయల్స్ కెప్టెన్ రియాన్ పరాగ్ కు బీసీసీఐ భారీ జరిమానా విధించడం తెలిసిందే. అతడి చర్యపై తీవ్ర విమర్శలు కూడా వచ్చాయి. అయితే, ఆ వివాదం ప్రభావం తనపై ఏమాత్రం లేదని చాటిచెబుతూ, రియాన్ పరాగ్ ఇవాళ చెలరేగిపోయాడు. ఢిల్లీ క్యాపిటల్స్‌తో జరిగిన మ్యాచ్‌లో అద్భుతమైన కెప్టెన్ ఇన్నింగ్స్ ఆడి తన జట్టుకు భారీ స్కోరు అందించాడు. వివాదం తాలూకు ఒత్తిడి తనపై ఏమాత్రం లేదని నిరూపిస్తూ, 50 బంతుల్లో 8 ఫోర్లు, 5 సిక్సర్లతో 90 పరుగులు చేసి, తృటిలో సెంచరీ చేజార్చుకున్నాడు.

జైపూర్‌లోని సవాయ్ మాన్ సింగ్ స్టేడియంలో టాస్ గెలిచి బ్యాటింగ్ ఎంచుకున్న రాజస్థాన్ రాయల్స్‌కు ఆరంభంలోనే గట్టి ఎదురుదెబ్బ తగిలింది. యశస్వి జైస్వాల్ (6), వైభవ్ సూర్యవంశీ (4) త్వరగా పెవిలియన్ చేరడంతో రాజస్థాన్ 12 పరుగులకే 2 వికెట్లు కోల్పోయి కష్టాల్లో పడింది. ఈ క్లిష్ట దశలో క్రీజులోకి వచ్చిన కెప్టెన్ రియాన్ పరాగ్, ధ్రువ్ జురెల్ (42) తో కలిసి ఇన్నింగ్స్‌ను చక్కదిద్దాడు. వీరిద్దరూ మూడో వికెట్‌కు 102 పరుగుల కీలక భాగస్వామ్యాన్ని నెలకొల్పి జట్టును పటిష్ట స్థితికి చేర్చారు.

ఒకవైపు వికెట్లు పడుతున్నా, ఏమాత్రం ఒత్తిడికి గురికాకుండా ఢిల్లీ బౌలర్లపై పరాగ్ ఎదురుదాడికి దిగాడు. ముఖ్యంగా స్పిన్నర్లను లక్ష్యంగా చేసుకుని భారీ షాట్లతో అలరించాడు. పరాగ్ విధ్వంసానికి తోడు, రవీంద్ర జడేజా (20) కూడా రాణించాడు. అయితే, పరాగ్ సెంచరీకి చేరువవుతున్న దశలో మిచెల్ స్టార్క్ బౌలింగ్‌లో అవుటయ్యాడు.

పరాగ్ అవుటయ్యాక, చివర్లో డొనోవాన్ ఫెరీరా (47; 14 బంతుల్లో, 2 ఫోర్లు, 6 సిక్సర్లు) సుడిగాలి ఇన్నింగ్స్ ఆడాడు. 335.71 స్ట్రైక్ రేట్‌తో బ్యాటింగ్ చేసిన అతను, కేవలం 14 బంతుల్లోనే 6 సిక్సర్లతో విరుచుకుపడి జట్టు స్కోరును 200 పరుగులు దాటించాడు. అతని మెరుపు ఇన్నింగ్స్ కారణంగా రాజస్థాన్ భారీ స్కోరు సాధించగలిగింది.

ఢిల్లీ బౌలర్లందరూ ధారాళంగా పరుగులు సమర్పించుకున్నప్పటికీ, గాయం నుంచి కోలుకుని పునరాగమనం చేసిన ఆస్ట్రేలియా పేసర్ మిచెల్ స్టార్క్ (3/40) కాస్త ఫర్వాలేదనిపించాడు. కీలకమైన జైస్వాల్, పరాగ్, జడేజా వికెట్లను పడగొట్టి తన పునరాగమనాన్ని ఘనంగా చాటాడు. మరోవైపు కైల్ జేమీసన్ (1/48), నటరాజన్ (1/55) భారీగా పరుగులు ఇచ్చారు.

మొత్తం మీద, రాజస్థాన్ రాయల్స్ నిర్ణీత 20 ఓవర్లలో 6 వికెట్ల నష్టానికి 225 పరుగుల భారీ స్కోరు నమోదు చేసింది. పరాగ్ కెప్టెన్ ఇన్నింగ్స్, ఫెరీరా మెరుపులతో ఢిల్లీ ముందు కొండంత లక్ష్యాన్ని ఉంచింది.