ప్ర‌తి ఫ్లైట్ జ‌ర్నీకి ముందు ఆమిర్ ఖాన్ చేసే వింత‌ ప‌నేంటో తెలిస్తే ఆశ్చ‌ర్యపోతారు!

బాలీవుడ్ మిస్టర్ పర్ఫెక్షనిస్ట్ ఆమిర్ ఖాన్ తన సినిమా పట్ల ఎంత అంకితభావంతో ఉంటారో ప్రత్యేకంగా చెప్పనక్కర్లేదు. అయితే, ఆ పర్ఫెక్షన్ వెనుక ఓ వింత భయం, ఓ నమ్మకమైన ఆనవాయతీ కూడా ఉందని ఆయనే స్వయంగా వెల్లడించారు. విమాన ప్రమాదంలో తాను చనిపోతే తన సినిమా భవిష్యత్తు ఏమవుతుందోనన్న ఆందోళనతో ప్రతిసారీ విమానం ఎక్కే ముందు ఒక ప్రత్యేకమైన పని చేస్తానని తెలిపారు. ఇటీవల 'ది హాలీవుడ్ రిపోర్టర్ ఇండియా'కు ఇచ్చిన ఇంటర్వ్యూలో ఆమిర్ ఈ ఆసక్తికర విషయాలను పంచుకున్నారు.

సినిమా షూటింగ్ పూర్తయి, పోస్ట్ ప్రొడక్షన్ పనులు తుది దశకు చేరుకున్నప్పుడు తాను చాలా ఒత్తిడికి గురవుతానని ఆమిర్ చెప్పారు. "ఆ సమయంలో నేను విమానంలో ప్రయాణించాల్సి వస్తే, ఒకవేళ విమానం కూలిపోయి నేను చనిపోతే? సినిమా ఆగిపోకూడదు, దాని నాణ్యత దెబ్బతినకూడదు. అందుకే ప్రతిసారీ ఫ్లైట్ ఎక్కే ముందు నా కజిన్, ప్రముఖ దర్శకుడు మన్సూర్ ఖాన్‌కు ఒక నోట్ రాస్తాను. సినిమాను ఎలా పూర్తి చేయాలో అందులో సూచనలిస్తాను" అని ఆమిర్ నవ్వుతూ వివరించారు.

ఈ ఏర్పాటు వెనుక మన్సూర్ ఖాన్ మీద తనకున్న అపారమైన నమ్మకమే కారణమని ఆమిర్ స్పష్టం చేశారు. "సినీ పరిశ్రమలో నేను పూర్తిగా నమ్మే ఒకే ఒక్క వ్యక్తి మన్సూర్. అతని సృజనాత్మక ఆలోచనలపై నాకు అంత నమ్మకం. ఈ విషయం నా మాజీ భార్య కిరణ్ రావుకు కూడా చెప్పాను. నాకు ఏమైనా జరిగితే, సినిమాకు సంబంధించిన ఏ విషయమైనా మన్సూర్‌ను సంప్రదించాలని సూచించాను" అని తెలిపారు.

ఆమిర్ ఖాన్, మన్సూర్ ఖాన్ కాంబినేషన్‌లో ‘ఖయామత్ సే ఖయామత్ తక్’ (1988), ‘జో జీతా వహీ సికందర్’ (1994), ‘అకేలే హమ్ అకేలే తుమ్’ (1995) వంటి క్లాసిక్ చిత్రాలు వచ్చాయి. 2000లో 'జోష్' తర్వాత మన్సూర్ దర్శకత్వానికి దూరమైనా, ఆమిర్ ఖాన్ నిర్మాణ సంస్థలో ఆయన కీలక పాత్ర పోషిస్తూనే ఉన్నారు. తమ మేనల్లుడు ఇమ్రాన్ ఖాన్ హీరోగా వచ్చిన ‘జానే తూ యా జానే నా’ చిత్రానికి, తాజాగా తన కొడుకు జునైద్ ఖాన్, సాయి పల్లవి జంటగా నటిస్తున్న ‘ఏక్ దిన్’ సినిమాకు కూడా మన్సూర్ క్రియేటివ్ ప్రొడ్యూసర్‌గా వ్యవహరించారని ఆమిర్ గుర్తుచేసుకున్నారు.