అమెరికా పద్ధతి మార్చుకుంటే చర్చలకు మేం సిద్దం: ఇరాన్ అధ్యక్షుడు పెజెష్కియాన్

అమెరికా తన వైఖరి మార్చుకుంటే, దౌత్యమార్గంలో చర్చలు జరపడానికి టెహ్రాన్ సిద్ధంగా ఉందని ఇరాన్ అధ్యక్షుడు మసూద్ పెజెష్కియాన్ స్పష్టం చేశారు. రెచ్చగొట్టే చర్యలు, మితిమీరిన విధానాలకు వాషింగ్టన్ స్వస్తి పలికితేనే దౌత్య ప్రక్రియను ముందుకు తీసుకెళతామని ఆయన గురువారం తెలిపారు.

జపాన్ ప్రధాని సనాయే టకాయిచీతో ఫోన్‌లో మాట్లాడిన పెజెష్కియాన్, గల్ఫ్ మరియు హర్మూజ్ జలసంధిలో ప్రస్తుత అభద్రతకు అమెరికా, ఇజ్రాయెల్ చర్యలే కారణమని ఆరోపించారు. ఇరాన్ నౌకలపై అమెరికన్ సముద్రపు దొంగతనాన్ని ఆపాలని, దానిని అందరూ ఖండించాలని ఆయన డిమాండ్ చేశారు.

ఈ సంభాషణలో భాగంగా హర్మూజ్ జలసంధిలో చిక్కుకున్న జపాన్ నౌక, సిబ్బందిని విడిచిపెట్టడంపై ఇరువురు నేతలు చర్చించారు. ముగ్గురు జపాన్ సిబ్బందితో ఉన్న తమ నౌకను సురక్షితంగా పంపడాన్ని సానుకూల పరిణామంగా భావిస్తున్నట్లు టకాయిచీ పేర్కొన్నారు. అమెరికా, ఇరాన్ మధ్య చర్చలు త్వరగా పునఃప్రారంభమై తుది ఒప్పందం కుదరాలని ఆమె ఆకాంక్షించారు. హోర్ముజ్ జలసంధిలో అన్ని దేశాల నౌకలకు స్వేచ్ఛాయుత, సురక్షిత ప్రయాణాన్ని కల్పించాలని ఆమె గట్టిగా కోరారు.

కాగా, పర్షియన్ గల్ఫ్ నేషన్ డే సందర్భంగా పెజెష్కియాన్ మాట్లాడుతూ, సముద్ర మార్గాలపై దిగ్బంధనం విధించడం అంతర్జాతీయ చట్టాలకు విరుద్ధమని, ఇది ప్రపంచ శాంతికి ముప్పు అని అన్నారు. పాకిస్థాన్‌లో విఫలమైన చర్చల అనంతరం అమెరికా హోర్ముజ్ జలసంధిపై దిగ్బంధనం విధించిన విషయం తెలిసిందే.