ఢిల్లీ క్యాపిటల్స్ కు శుభవార్త... స్టార్క్ వచ్చేస్తున్నాడు!

ఇండియన్ ప్రీమియర్ లీగ్ (ఐపీఎల్) 2026లో వరుస ఓటములతో సతమతమవుతున్న ఢిల్లీ క్యాపిటల్స్ (డీసీ) జట్టుకు భారీ ఊరట లభించింది. ఆ జట్టు స్టార్ పేసర్ మిచెల్ స్టార్క్ గాయం నుంచి పూర్తిగా కోలుకున్నాడు. రాజస్థాన్ రాయల్స్‌తో జరగనున్న కీలక మ్యాచ్‌కు అతను అందుబాటులో ఉంటాడని డీసీ బౌలింగ్ కోచ్ మునాఫ్ పటేల్ స్పష్టం చేశారు. శుక్రవారం జైపూర్‌లోని సవాయ్ మాన్‌సింగ్ స్టేడియంలో ఈ మ్యాచ్ జరగనుంది.

ప్రీ-మ్యాచ్ ప్రెస్‌ కాన్ఫరెన్స్‌లో మునాఫ్ పటేల్ మాట్లాడుతూ, "స్టార్క్ రేపటి నుంచి సెలక్షన్‌కు అందుబాటులో ఉంటాడు. మా అత్యుత్తమ బౌలర్ తప్పకుండా ఆడతాడు. అయితే తుది నిర్ణయం రేపు తీసుకుంటాం. అతని రాక జట్టుకు కచ్చితంగా మేలు చేస్తుంది" అని తెలిపాడు. భుజం, మోచేతి గాయంతో బాధపడుతున్న స్టార్క్, కొద్దిరోజుల క్రితమే జట్టుతో కలిశాడు. జనవరి తర్వాత స్టార్క్ ఆడనున్న తొలి ప్రొఫెషనల్ మ్యాచ్ ఇదే కావడం గమనార్హం.

ఈ సందర్భంగా మునాఫ్ పటేల్ మాట్లాడుతూ, "బ్యాటర్లు మ్యాచ్‌లను గెలిపించగలరు, కానీ టోర్నీలను గెలిపించేది బౌలర్లే" అని అన్నాడు. గత మ్యాచ్‌లో ఆర్‌సీబీపై 75 పరుగులకే ఆలౌట్ కావడంపై స్పందిస్తూ, తాము ఒత్తిడిలో లేమని, కొత్త వ్యూహంతో ఆడామని తెలిపాడు. "ఇక డూ ఆర్ డై మ్యాచ్‌లలో 100 శాతం ప్రదర్శన ఇవ్వాలి, లేకపోతే టోర్నీలో నిలవడం కష్టం" అని అన్నాడు. రాజస్థాన్ బ్యాటింగ్‌ను ఎదుర్కొనే వ్యూహాలను మాత్రం మునాఫ్ వెల్లడించలేదు. గాయాలు తప్పనిసరి అయితే తప్ప తుది జట్టులో పెద్దగా మార్పులు ఉండవని మునాఫ్ స్పష్టం చేశాడు.