భగ్గుమన్న క్రూడ్ ఆయిల్.. భారీ నష్టాల్లో మార్కెట్లు

పశ్చిమాసియాలో నెలకొన్న రాజకీయ ఉద్రిక్తతల కారణంగా అంతర్జాతీయంగా ముడిచమురు ధరలు పెరగడంతో దేశీయ స్టాక్ మార్కెట్లు మంగళవారం నష్టాల్లో ముగిశాయి. అమెరికా, ఇరాన్ మధ్య నెలకొన్న ప్రతిష్టంభనతో మదుపరులు అప్రమత్తంగా వ్యవహరించారు. ఫలితంగా, మార్కెట్లు ముగిసే సమయానికి సెన్సెక్స్ 416.72 పాయింట్లు నష్టపోయి 76,886.91 వద్ద స్థిరపడింది. నిఫ్టీ 97 పాయింట్లు క్షీణించి 23,995.70 వద్ద ముగిసింది.

ప్రధాన సూచీలు నష్టపోయినప్పటికీ, మిడ్, స్మాల్ క్యాప్ సూచీలు మాత్రం లాభాలతో రాణించడం విశేషం. నిఫ్టీ మిడ్‌క్యాప్ 0.28 శాతం, స్మాల్‌క్యాప్ 0.42 శాతం మేర లాభపడ్డాయి. సెన్సెక్స్‌లో అదానీ పోర్ట్స్, ఐటీసీ, భారతీ ఎయిర్‌టెల్, టెక్ మహీంద్రా షేర్లు లాభపడగా.. హెచ్‌సీఎల్ టెక్, యాక్సిస్ బ్యాంక్, ఐసీఐసీఐ బ్యాంక్, ఇన్ఫోసిస్ షేర్లు నష్టపోయాయి. రంగాలవారీగా చూస్తే బ్యాంకింగ్ షేర్లు అమ్మకాల ఒత్తిడికి గురయ్యాయి. ఆయిల్ అండ్ గ్యాస్, మెటల్ షేర్లు లాభాలను నమోదు చేశాయి.

వ్యూహాత్మకమైన హర్మూజ్ జలసంధిని తిరిగి తెరిచేందుకు ఇరాన్ చేసిన ప్రతిపాదన పట్ల అమెరికా అధ్యక్షుడు డొనాల్డ్ ట్రంప్ అసంతృప్తిగా ఉన్నారని వచ్చిన నివేదికలతో మార్కెట్ సెంటిమెంట్ బలహీనపడింది. దీంతో బ్రెంట్ క్రూడ్ బ్యారెల్ ధర 2.78 శాతం పెరిగి 111.24 డాలర్లకు చేరింది. ముడిచమురు ధరల పెరుగుదల భారత్ వంటి దిగుమతులపై ఆధారపడిన ఆర్థిక వ్యవస్థకు ప్రతికూలమని విశ్లేషకులు భావిస్తున్నారు. ఈ పరిణామాల నేపథ్యంలో డాలర్‌తో రూపాయి మారకం విలువ కూడా 0.38 శాతం క్షీణించి 94.54 వద్ద ట్రేడ్ అయింది.