స్టాక్ మార్కెట్లకు శుభారంభం.. లాభాల్లో సెన్సెక్స్, నిఫ్టీ

అంతర్జాతీయ మార్కెట్ల నుంచి అందిన సానుకూల సంకేతాలతో దేశీయ స్టాక్ మార్కెట్లు సోమవారం లాభాలతో ప్రారంభమయ్యాయి. ట్రేడింగ్ ఆరంభంలోనే సూచీలు దాదాపు 0.6 శాతం మేర లాభపడ్డాయి. సెన్సెక్స్ 457 పాయింట్లు (0.59%) పెరిగి 77,121 వద్ద ట్రేడ్ అవుతుండగా, నిఫ్టీ 150 పాయింట్లు (0.62%) లాభపడి 24,047 వద్ద కొనసాగుతోంది. రియల్టీ, ఫార్మా, ఐటీ, ఆటో, బ్యాంకింగ్ షేర్లలో కొనుగోళ్ల మద్దతు మార్కెట్లకు కలిసొచ్చింది.

సెషన్ ఆరంభంలో నిఫ్టీ 47 పాయింట్ల లాభంతో 23,945 వద్ద, సెన్సెక్స్ 191 పాయింట్ల లాభంతో 76,856 వద్ద ట్రేడింగ్ మొదలుపెట్టాయి. రంగాల వారీగా చూస్తే నిఫ్టీ రియల్టీ, ఫార్మా, ఐటీ, ఆటో, పీఎస్‌యూ బ్యాంక్ సూచీలు 2 శాతం వరకు లాభపడ్డాయి. అయితే, యాక్సిస్ బ్యాంక్, శ్రీరామ్ ఫైనాన్స్, బజాజ్ ఫైనాన్స్ షేర్లు నష్టాలను చవిచూశాయి. మిడ్‌క్యాప్, స్మాల్‌క్యాప్ సూచీలు కూడా 1 శాతం వరకు పెరిగి మార్కెట్లలో సానుకూల ధోరణిని సూచించాయి. అస్థిరతను సూచించే ఇండియా విక్స్ 2 శాతానికి పైగా తగ్గి 19.24 వద్ద ఉంది.

విశ్లేషకుల ప్రకారం నిఫ్టీకి 23,800–23,900 స్థాయుల వద్ద మద్దతు, 24,200 వద్ద నిరోధం ఉంది. ఫెడరల్ రిజర్వ్ సమావేశం, కీలక ఆర్థిక గణాంకాలు, గ్లోబల్ టెక్ దిగ్గజాల ఫలితాలను మదుపరులు గమనిస్తున్నారు. మరోవైపు, అంతర్జాతీయంగా బ్రెంట్ క్రూడ్ ధర బ్యారెల్‌కు 107 డాలర్ల పైకి చేరడం, రూపాయి బలహీనత, మధ్యప్రాచ్యంలో భౌగోళిక ఉద్రిక్తతలు మార్కెట్లపై ఒత్తిడి పెంచే అవకాశముందని నిపుణులు భావిస్తున్నారు.