ఢిల్లీ వీధుల్లో ఆర్సీబీ స్టార్ల గల్లీ క్రికెట్.. వీడియో వైరల్!

ఐపీఎల్ 2026 సీజన్‌లో అద్భుత ఫామ్‌తో దూసుకుపోతున్న రాయల్ ఛాలెంజర్స్ బెంగళూరు (ఆర్‌సీబీ) ఆటగాళ్లు మైదానంలోనే కాకుండా బయట కూడా అభిమానులను అలరిస్తున్నారు. ఆ జట్టు స్టార్ ప్లేయర్లు టిమ్ డేవిడ్, రొమారియో షెపర్డ్ ఢిల్లీ వీధుల్లో స్థానిక యువకులతో కలిసి గల్లీ క్రికెట్ ఆడుతూ సందడి చేశారు. ఇందుకు సంబంధించిన వీడియోలు ప్రస్తుతం నెట్టింట‌ వైరల్ అవుతున్నాయి. ఈ స్టార్ ఆటగాళ్ల నిరాడంబరత చూసి నెటిజన్లు ప్రశంసల వర్షం కురిపిస్తున్నారు.

ఢిల్లీ క్యాపిటల్స్‌తో మ్యాచ్ కోసం దేశ రాజధానికి చేరుకున్న ఆర్‌సీబీ ఆటగాళ్లు ప్రాక్టీస్ నుంచి కాస్త విరామం తీసుకున్నారు. ఈ సమయంలో టిమ్ డేవిడ్, రొమారియో షెపర్డ్ ఢిల్లీలోని ఇరుకైన వీధుల్లోకి వెళ్లి అక్కడి కుర్రాళ్లతో కలిసి గల్లీ క్రికెట్ ఆడారు. ఏమాత్రం సంకోచం లేకుండా అభిమానులతో కలిసిపోయి భారీ షాట్లు కొడుతూ వారిని ఉత్సాహపరిచారు. ఈ వీడియోను ఒక యూజర్ సోషల్ మీడియాలో షేర్ చేస్తూ.. "వీళ్లు చాలా సరదా మనుషులు" అంటూ క్యాప్షన్ జతచేశారు. అంతర్జాతీయ స్టార్లు తమతో కలిసి క్రికెట్ ఆడటంతో అభిమానుల ఆనందానికి అవధుల్లేకుండా పోయాయి.

ఈ ఐపీఎల్ సీజన్‌లో టిమ్ డేవిడ్ అద్భుతమైన ఫామ్‌లో ఉన్నాడు. ఆర్‌సీబీ తరఫున నంబర్ 5 స్థానంలో బ్యాటింగ్‌కు వస్తూ మ్యాచ్‌లను ఫినిష్ చేస్తున్నాడు. ఇప్పటివరకు 7 మ్యాచ్‌లలో 203.52 స్ట్రైక్ రేటు, 91.50 సగటుతో 183 పరుగులు చేశాడు. మరోవైపు ఆల్‌రౌండర్ రొమారియో షెపర్డ్ బ్యాట్‌తో పెద్దగా రాణించకపోయినా (7 మ్యాచ్‌ల్లో 39 పరుగులు), బంతితో కీలక పాత్ర పోషించాడు. సన్‌రైజర్స్ హైదరాబాద్‌తో జరిగిన మ్యాచ్‌లో 3 వికెట్లు పడగొట్టి జట్టు విజయంలో పాలుపంచుకున్నాడు.

ప్రస్తుతం ఆర్‌సీబీ జట్టు పాయింట్ల పట్టికలో రెండో స్థానంలో కొనసాగుతోంది. ఆడిన 7 మ్యాచ్‌లలో 5 విజయాలు సాధించి 10 పాయింట్లతో ప్లే ఆఫ్స్ రేసులో దూసుకెళ్తోంది. ఇవాళ‌ ఢిల్లీలోని అరుణ్ జైట్లీ స్టేడియంలో ఢిల్లీ క్యాపిటల్స్‌తో ఆర్‌సీబీ తలపడనుంది. ఈ కీలక మ్యాచ్‌కు ముందు ఆటగాళ్లు ఇలా సరదాగా గడపడం జట్టులో సానుకూల వాతావరణాన్ని సూచిస్తోందని విశ్లేషకులు చెబుతున్నారు.