చర్చలు ఉన్నట్టా, లేనట్టా?... పాకిస్థాన్ లో మళ్లీ ప్రత్యక్షమైన ఇరాన్ విదేశాంగ మంత్రి అరాఘ్చీ

అమెరికా, ఇరాన్ మధ్య జరగాల్సిన రెండో విడత పరోక్ష చర్చలపై సందిగ్ధత నెలకొంది. పాకిస్థాన్ వేదికగా ఈ చర్చలు జరుగుతాయని భావిస్తున్న తరుణంలో అనూహ్య పరిణామాలు చోటుచేసుకున్నాయి. ఇరాన్ విదేశాంగ శాఖ మంత్రి అబ్బాస్ అరాఘ్చీ పాకిస్థాన్‌లో అడుగుపెట్టి, అమెరికా ప్రతినిధులు రాకముందే ఇస్లామాబాద్ నుంచి ఒమన్‌కు వెళ్లిపోయారు. ఈ పరిణామంతో అమెరికా అధ్యక్షుడు డొనాల్డ్ ట్రంప్ తమ ప్రతినిధుల పాకిస్థాన్ పర్యటనను రద్దు చేస్తున్నట్లు ప్రకటించారు.

ఇరు దేశాల మధ్య ఉద్రిక్తతలను తగ్గించేందుకు రెండో విడత చర్చలు నిర్వహించాలని ప్రయత్నాలు జరుగుతున్నాయి. ఇందులో భాగంగా ఇరాన్ మంత్రి అబ్బాస్ అరాఘ్చీ మరోసారి పాకిస్థాన్‌కు చేరుకున్నారు. అయితే, ఆయన అమెరికా బృందం కోసం ఎదురుచూడకుండా హఠాత్తుగా ఒమన్‌కు పయనం కావడం ఉత్కంఠ రేపింది. ఈ నేపథ్యంలో తమ ప్రతినిధులను పాకిస్థాన్‌కు పంపడం లేదని ట్రంప్ స్పష్టం చేయడంతో చర్చల భవిష్యత్తు ప్రశ్నార్థకంగా మారింది.

గతంలో కూడా ఒమన్ వేదికగా అమెరికా, ఇరాన్ మధ్య పరోక్ష చర్చలు జరిగాయి. ఇప్పుడు అరాఘ్చీ నేరుగా ఒమన్‌కు వెళ్లడంతో ఈ పర్యటనకు ప్రాధాన్యత సంతరించుకుంది. ఇప్పుడు ఆయన మళ్లీ పాకిస్థాన్‌కు చేరుకోవడం గమనార్హం. అయితే, అరాఘ్చీ రష్యా పర్యటనకు వెళ్లే ముందు ఇస్లామాబాద్ వెళ్లారని ఇరాన్ ప్రభుత్వ మీడియా వెల్లడించింది.