టోల్ ప్లాజా సిబ్బందిపై కల్యాణదుర్గం ఎమ్మెల్యే అనుచరుల దాడి.. వైరల్ అవుతున్న వీడియోలు

అన్నమయ్య జిల్లా కల్యాణదుర్గం టీడీపీ ఎమ్మెల్యే అమిలినేని సురేంద్రబాబు అనుచరులు టోల్ ప్లాజా సిబ్బందిపై దాడికి పాల్పడినట్టు వస్తున్న ఆరోపణలు తీవ్ర కలకలం రేపుతున్నాయి. అన్నమయ్య జిల్లా వాల్మీకిపురం మండలం గండబోయినపల్లె టోల్ ప్లాజా వద్ద నిన్న ఈ ఘటన చోటుచేసుకుంది. ఈ గొడవకు సంబంధించిన వీడియోలు సోషల్ మీడియాలో వైరల్ కాగా, ఘటనపై భిన్న కథనాలు వినిపిస్తున్నాయి.

వివరాల్లోకి వెళ్తే, ఎమ్మెల్యే వాహనాన్ని టోల్ గేట్ వద్ద ఆపారన్న కారణంతో ఆయన అనుచరులు, గన్‌మెన్లు సిబ్బందిపై దాడి చేశారని ఆరోపణలు వెల్లువెత్తాయి. "మేము అధికారంలో ఉండగా ఎమ్మెల్యే బండిని ఆపుతారా?" అంటూ శ్రీలత అనే మహిళా ఉద్యోగిని జుట్టు పట్టుకుని కొట్టారని, మేనేజర్ రవిని బలవంతంగా కారులో ఎక్కించుకుని తీసుకెళ్లారని బాధితులు ఆరోపించినట్టు తొలుత వార్తలు వచ్చాయి.

అయితే, ఈ ఆరోపణలపై ఎమ్మెల్యే సురేంద్రబాబు స్పందించారు. టోల్ సిబ్బందే తమతో దురుసుగా ప్రవర్తించారని, రుసుము చెల్లించడానికి సిద్ధంగా ఉన్నా దాదాపు 10 నిమిషాల పాటు వాహనాన్ని నిలిపివేశారని ఆయన తెలిపారు. తమ సిబ్బంది ప్రతిఘటించారే తప్ప దాడి చేయలేదని వివరించారు. మేనేజర్‌ను కిడ్నాప్ చేయలేదని, అతని ప్రవర్తనపై ఫిర్యాదు చేసేందుకు వాయల్పాడు పోలీస్ స్టేషన్‌కు తీసుకెళ్లామని, అనంతరం వారు క్షమాపణ చెప్పడంతో వివాదం ముగిసిందని సురేంద్రబాబు పేర్కొన్నారు.

ఈ వివాదంలో మరో కీలక పరిణామం చోటుచేసుకుంది. తనపై ఎలాంటి దాడి జరగలేదని టోల్ ప్లాజా మేనేజర్ రవి చెప్పినట్లుగా కొన్ని కథనాలు వెలువడ్డాయి. మరోవైపు, ఈ ఘటనపై తమకు ఎటువంటి ఫిర్యాదు అందలేదని, కేసు నమోదు చేయలేదని వాల్మీకిపురం పోలీసులు స్పష్టం చేశారు. దీంతో ఈ వివాదంపై గందరగోళం నెలకొంది. అయితే, ఎమ్మెల్యే అనుచరులు టోల్ ప్లాజా వద్ద సిబ్బందిపై దౌర్జన్యం చేసిన దృశ్యాలు అక్కడి సీసీ టీవీ పుటేజీలో రికార్డు అవ్వడంతో అవి సోషల్ మీడియాలో వైరల్ అయ్యాయి.