అనంతబాబు ఇన్ని రోజులూ జగన్ ప్యాలెస్‌లోనే తలదాచుకున్నాడు: సానా సతీష్

మాజీ ముఖ్యమంత్రి జగన్ ఇటీవల చేస్తున్న వ్యాఖ్యలు రాష్ట్ర పారిశ్రామిక వాతావరణాన్ని దెబ్బతీసి, అభివృద్ధికి పెను ముప్పుగా మారుతున్నాయని టీడీపీ రాజ్యసభ సభ్యుడు సానా సతీష్ బాబు తీవ్ర ఆందోళన వ్యక్తం చేశారు. రాష్ట్రంలో పెట్టుబడులు పెట్టేందుకు వస్తున్న పారిశ్రామికవేత్తల్లో గందరగోళం సృష్టించేందుకు జగన్ ప్రయత్నిస్తున్నారని ఆయన ఆరోపించారు. శుక్రవారం గుంటూరు జిల్లా మంగళగిరిలోని టీడీపీ కార్యాలయంలో ఆయన మీడియాతో మాట్లాడారు.

దళితులపై దాడులకు పాల్పడిన నిందితులను కాపాడేందుకు జగన్ తన ప్యాలెస్‌లను స్థావరాలుగా మారుస్తున్నారని సతీష్ సంచలన ఆరోపణలు చేశారు. దళిత డ్రైవర్ సుబ్రహ్మణ్యం హత్య కేసులో ప్రధాన నిందితుడైన ఎమ్మెల్సీ అనంతబాబు ఇన్నాళ్లూ జగన్ ప్యాలెస్‌లోనే తలదాచుకున్నాడని, ఇది దళితుల పట్ల వైసీపీకి ఉన్న వ్యతిరేకతను స్పష్టం చేస్తోందని అన్నారు. హత్యా రాజకీయాలు జగన్‌కు, ఆయన కుటుంబానికి తాతల కాలం నుంచి వస్తున్న ఆనవాయితీ అని ఆయన తీవ్రంగా విమర్శించారు.

ప్రశాంతంగా ఉండే గోదావరి జిల్లాల్లో కులాల మధ్య చిచ్చు పెట్టేందుకు జగన్ కుట్ర పన్నుతున్నారని సతీష్ ఆరోపించారు. తన కరపత్రిక (సాక్షి) ద్వారా కాపు, కమ్మ వంటి కులాల మధ్య విభేదాలు సృష్టించేలా తప్పుడు కథనాలు రాయిస్తున్నారని మండిపడ్డారు. అధికారంలో ఉన్నప్పుడు కొన్ని కులాల మధ్య, అధికారం కోల్పోయాక మరికొన్ని కులాల మధ్య చిచ్చు పెట్టాలని చూడటం జగన్ నైజమని దుయ్యబట్టారు. ఇలాంటి కుట్రలను ప్రజలు సహించరని హెచ్చరించారు.

రాష్ట్రం అభివృద్ధి పథంలో ముందుకు సాగుతుంటే పోలవరం, అమరావతి నిర్మాణం, కొత్త పరిశ్రమల ఏర్పాటు వంటి కీలక కార్యక్రమాలను అడ్డుకునేందుకు వైసీపీ ప్రయత్నిస్తోందని ఆయన అన్నారు. ప్రజలు అభివృద్ధిని కోరుకుంటున్నారని, అందుకే ఇటీవల జరిగిన ఎన్నికల్లో వైసీపీని కేవలం 11 సీట్లకే పరిమితం చేసి తగిన తీర్పు ఇచ్చారని గుర్తుచేశారు. జగన్ తన పద్ధతి మార్చుకోకపోతే, భవిష్యత్తులో ఆ 11 సీట్లు కూడా ఒకే సీటుకు పడిపోవడం ఖాయమని సానా సతీష్ బాబు హెచ్చరించారు. ఎన్ని అడ్డంకులు సృష్టించినా రాష్ట్ర ప్రగతిని ఎవరూ ఆపలేరని ఆయన స్పష్టం చేశారు.