ప్రారంభ సెషన్లో 400 పాయింట్లు కోల్పోయిన సెన్సెక్స్.. ఐటీ షేర్లు ఢమాల్

దేశీయ స్టాక్ మార్కెట్లు శుక్రవారం ఉదయం నష్టాలతో ప్రారంభమయ్యాయి. అంతర్జాతీయంగా పెరుగుతున్న భౌగోళిక ఉద్రిక్తతలు, క్యూ4 త్రైమాసిక ఫలితాల సీజన్ నేపథ్యంలో సూచీలు తీవ్ర ఒత్తిడికి గురయ్యాయి. ఆరంభ ట్రేడింగ్‌లో సెన్సెక్స్ 400 పాయింట్లు (0.51%) నష్టపోయి 77,263 వద్ద కొనసాగుతుండగా, నిఫ్టీ 100 పాయింట్లు (0.41%) తగ్గి ట్రేడ్ అవుతోంది.

ముఖ్యంగా ఐటీ, ఫైనాన్షియల్, ఫార్మా స్టాక్స్‌లో అమ్మకాల హోరు కనిపించింది. దీంతో నిఫ్టీ ఐటీ ఇండెక్స్ 1.57 శాతం పడిపోయింది. సిప్లా, ఇన్ఫోసిస్, డాక్టర్ రెడ్డీస్ ల్యాబొరేటరీస్, సన్ ఫార్మా, టీసీఎస్, ఐసీఐసీఐ బ్యాంక్ షేర్లు నష్టపోయిన వాటిలో ముందున్నాయి. అయితే, ఎఫ్‌ఎంసీజీ, కెమికల్ రంగాల షేర్లకు కొంత కొనుగోళ్ల మద్దతు లభించింది.

ప్రస్తుత ప్రపంచ అనిశ్చితులు, మార్కెట్లలో అధిక అస్థిరత కారణంగా ఇన్వెస్టర్లు ఆచితూచి వ్యవహరించాలని విశ్లేషకులు సూచిస్తున్నారు. మార్కెట్ దిద్దుబాటు సమయంలో మంచి ఫండమెంటల్స్ ఉన్న స్టాక్స్‌ను కొనుగోలు చేయడం మంచిదని సలహా ఇస్తున్నారు. నిఫ్టీ 24,500 స్థాయిని దాటి స్థిరపడిన తర్వాతే కొత్తగా లాంగ్ పొజిషన్లు తీసుకోవాలని వారు అభిప్రాయపడ్డారు.

మరోవైపు, అంతర్జాతీయ మార్కెట్లో బ్రెంట్ క్రూడ్ ఆయిల్ ధర దాదాపు 2 శాతం పెరిగి బ్యారెల్‌కు 107 డాలర్లకు చేరింది. విదేశీ సంస్థాగత ఇన్వెస్టర్లు (FIIలు) గురువారం వరుసగా నాలుగో రోజు తమ అమ్మకాలను కొనసాగించి, రూ. 3,254 కోట్ల విలువైన ఈక్విటీలను విక్రయించారు. అదే సమయంలో దేశీయ సంస్థాగత ఇన్వెస్టర్లు (DIIలు) రూ. 941 కోట్ల విలువైన షేర్లను కొనుగోలు చేశారు.