ఆ ఉగ్ర నేతను పట్టిస్తే రూ.94 కోట్లు.. అమెరికా భారీ నజరానా ప్రకటన

ఇరాక్‌లో ఇరాన్ మద్దతుతో పనిచేస్తున్న ఓ కీలక మిలీషియా నాయకుడిని పట్టిచ్చేందుకు అమెరికా భారీ నజరానా ప్రకటించింది. కతాయెబ్ సయ్యద్ అల్ షుహాదా (KSS) అనే ఉగ్రవాద సంస్థకు నాయకుడైన హషీమ్ ఫిన్యాన్ రహీమ్ అల్-సరాజీ అలియాస్ అబూ వాలా అల్ వాయెలీని అరెస్ట్ చేయడానికి దారితీసే సమాచారం అందిస్తే 10 మిలియన్ డాలర్లు (సుమారు రూ. 94 కోట్లు) రివార్డుగా ఇస్తామని ప్రకటించింది.

అమెరికా విదేశాంగ శాఖకు చెందిన "రివార్డ్స్ ఫర్ జస్టిస్" కార్యక్రమం కింద ఈ ప్రకటన వెలువడింది. ఇరాక్, సిరియాలలో అమెరికా దళాలు, దౌత్య కార్యాలయాలపై దాడులకు, ఇరాకీ పౌరుల మరణాలకు వాయెలీ నేతృత్వంలోని గ్రూప్ బాధ్యత వహించాలని అమెరికా ఆరోపించింది. సమాచారం అందించిన వారికి పూర్తి రక్షణతో పాటు, అవసరమైతే పునరావాసం కూడా కల్పిస్తామని స్పష్టం చేసింది. ఇరాక్‌లో ఇరాన్ అనుకూల మిలీషియాలపై ఒత్తిడి పెంచి, వాటిని కట్టడి చేసే కొత్త ప్రధానమంత్రి నియామకాన్ని ప్రోత్సహించే వ్యూహంలో భాగంగా ఈ నిర్ణయం తీసుకున్నట్లు తెలుస్తోంది.

ఎవరీ అబూ వాలా అల్ వాయెలీ?
అబూ వాలా అల్ వాయెలీ కేఎస్ఎస్ గ్రూప్‌లో చేరకముందు కతాయెబ్ హిజ్బుల్లా (KH) అనే మరో అమెరికా వ్యతిరేక షియా మిలీషియాలో సభ్యుడిగా ఉండేవాడు. ఆ సమయంలో ఉగ్రవాద కార్యకలాపాలకు పాల్పడినందుకు అమెరికా దళాలకు పట్టుబడి 2010లో విడుదలయ్యాడు. ఆ తర్వాత సిరియా అంతర్యుద్ధం సమయంలో కేఎస్ఎస్ గ్రూప్‌లో చేరాడు.

వాయెలీ నాయకత్వం వహిస్తున్న కేఎస్ఎస్ సంస్థ, ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) భావజాలంతో, వారి మద్దతుతో పనిచేస్తుంది. ఈ సంస్థ యెమెన్‌లోని హౌతీలకు కూడా తన మద్దతు ప్రకటించింది. విచిత్రమేమిటంటే, కేఎస్ఎస్ ఫైటర్లు ఇరాక్ అధికారిక భద్రతా దళాల్లో భాగమైన పాప్యులర్ మొబిలైజేషన్ కమిటీ (PMC)లోని 14వ బ్రిగేడ్‌గా కూడా కొనసాగుతున్నారు. కేఎస్ఎస్ కార్యకలాపాలను గమనించిన అమెరికా, 2023 నవంబర్ 17న వాయెలీని అంతర్జాతీయ ఉగ్రవాదిగా ప్రకటించింది. గడిచిన దశాబ్ద కాలంలో ఈ గ్రూపు అమెరికా దళాలపై దాదాపు 1,000 దాడులకు పాల్పడినట్లు నివేదికలున్నాయి.