బీహార్ ఆసుపత్రిలో మున్నాభాయ్ ఎంబీబీఎస్.. రోగికి కుట్లు వేసిన సెక్యూరిటీ గార్డు

బీహార్‌లోని ఓ ప్రభుత్వ ఆసుపత్రిలో అత్యంత దారుణమైన ఘటన వెలుగులోకి వచ్చింది. వైద్య సిబ్బంది కొరత కారణంగా ఓ సెక్యూరిటీ గార్డు గాయపడిన రోగికి కుట్లు వేస్తున్న వీడియో సోషల్ మీడియాలో వైరల్‌గా మారింది. పశ్చిమ చంపారన్ జిల్లాలోని బాగా సబ్-డివిజనల్ ఆసుపత్రిలోని మైనర్ ఆపరేషన్ థియేటర్‌లో ఈ సంఘటన చోటుచేసుకుంది.

ఒక టెంపో, పికప్ వ్యాన్ ఢీకొన్న రోడ్డు ప్రమాదంలో పలువురు తీవ్రంగా గాయపడ్డారు. వారిని చికిత్స కోసం బాగా ఆసుపత్రికి తరలించారు. ఆ సమయంలో వైద్యులు లేదా నర్సులకు బదులుగా, ఒక సెక్యూరిటీ గార్డు రోగికి కుట్లు వేయడం వీడియోలో స్పష్టంగా కనిపించింది. గాయపడిన వసీం అక్తర్, సురేంద్ర పాసి అనే బాధితులు తమకు సెక్యూరిటీ గార్డే కుట్లు వేశాడని తెలిపారు. శిక్షణ లేని వ్యక్తితో చికిత్స చేయించడం తీవ్ర నిర్లక్ష్యమని, ఇది తమ ప్రాణాలకే ప్రమాదమని వారు ఆవేదన వ్యక్తం చేశారు.

ఈ ఘటనపై తీవ్ర దుమారం రేగడంతో ఆసుపత్రి యాజమాన్యం స్పందించింది. డిప్యూటీ సూపరింటెండెంట్ డాక్టర్ అశోక్ కుమార్ తివారీ మాట్లాడుతూ.. ఆసుపత్రిలో చాలాకాలంగా సిబ్బంది కొరత ఉందని తెలిపారు. ఆపరేషన్ థియేటర్ అసిస్టెంట్లు, డ్రెస్సర్ల పోస్టులు ఖాళీగా ఉన్నాయన్నారు. ప్రమాదం జరిగిన రోజు ఒకేసారి చాలా మంది రోగులు రావడంతో, ఒకరికి తీవ్ర రక్తస్రావం అవుతుండటంతో డాక్టర్ పర్యవేక్షణలోనే సెక్యూరిటీ గార్డు సహాయం తీసుకున్నామని వివరించారు.

అయితే, ఈ ఘటన బీహార్ ఆరోగ్య వ్యవస్థలోని లోపాలను మరోసారి బయటపెట్టింది. 2016-2022 కాగ్ (CAG) నివేదిక ప్రకారం, రాష్ట్రంలోని కీలక ఆరోగ్య విభాగాల్లో 49% పోస్టులు ఖాళీగా ఉన్నాయి. ప్రపంచ ఆరోగ్య సంస్థ (WHO) ప్రకారం ప్రతి 1000 మందికి ఒక డాక్టర్ ఉండాల్సి ఉండగా, బీహార్‌లో 2,148 మందికి ఒకరే ఉన్నారని నివేదిక స్పష్టం చేసింది. ఈ తాజా ఘటనతో రాష్ట్రంలో వైద్య సేవలు ఏ స్థాయిలో ఉన్నాయో అర్థమవుతోందని పలువురు విమర్శిస్తున్నారు.