జస్ట్ 50 వేల డాలర్ల ఆయుధంతో లక్షల డాలర్ల ఫైటర్ జెట్లను కూల్చేస్తున్న ఇరాన్

అగ్రరాజ్యం అమెరికాకు ఇరాన్ చుక్కలు చూపిస్తోంది. లక్షల డాలర్లు వెచ్చించి తయారు చేసిన అత్యంత శక్తిమంతమైన యుద్ధ విమానాలను, కేవలం కొన్ని వేల డాలర్లకే లభించే చిన్న క్షిపణులతో కూల్చివేస్తోంది. 'మ్యాన్‌ప్యాడ్స్' (MANPADS)గా పిలిచే ఈ భుజంపై నుంచి ప్రయోగించే క్షిపణులు ఇప్పుడు అమెరికా వైమానిక శక్తికి పెను సవాలుగా మారాయి.

మ్యాన్‌ప్యాడ్స్ అంటే మ్యాన్-పోర్టబుల్ ఎయిర్ డిఫెన్స్ సిస్టమ్స్. వీటిని ఒక సాధారణ వ్యక్తి కూడా తన భుజంపై పెట్టుకుని సులువుగా ప్రయోగించవచ్చు. కేవలం 50 వేల డాలర్ల నుంచి 1.5 లక్షల డాలర్ల మధ్య ధర ఉండే ఈ క్షిపణులు... సుమారు 15,000 అడుగుల ఎత్తులో ప్రయాణించే విమానాలను కూడా ధ్వంసం చేయగలవు. ధ్వని కంటే రెండు రెట్ల వేగంతో ప్రయాణిస్తూ, 3.2 మైళ్ల పరిధిలోని లక్ష్యాలను ఇవి ఛేదిస్తాయి.

అమెరికా ఇంటెలిజెన్స్ వర్గాల సమాచారం ప్రకారం.. ఇరాన్ సుమారు 1,000కి పైగా ఇటువంటి క్షిపణులను చైనా నుంచి పొందుతోంది. అమెరికాతో నేరుగా వివాదం రాకుండా ఉండేందుకు చైనా ఈ క్షిపణులను ఇతర దేశాల ద్వారా ఇరాన్‌కు చేరవేస్తున్నట్లు తెలుస్తోంది. ఈ చవకైన అస్త్రాలతో ఇరాన్ ఇప్పటికే అమెరికాకు చెందిన ఎఫ్-15ఈ, ఏ-10 వంటి కొన్ని ఖరీదైన విమానాలను కూల్చివేసినట్లు సమాచారం.

ఈ క్షిపణులు చాలా చిన్నవిగా ఉండటంతో వీటిని గుర్తించడం అమెరికా సైన్యానికి కష్టతరంగా మారింది. ఒక కారు డిక్కీలో కూడా వీటిని దాచి, ఎక్కడికైనా తరలించవచ్చు. దీంతో, కోట్ల రూపాయల విలువైన అధునాతన టెక్నాలజీని ఎలా కాపాడుకోవాలో తెలియక అమెరికా తలపట్టుకుంటోంది.