'రామాయణ'పై స్పందించిన 'రావణుడు'... ఏమన్నారంటే?

కన్నడ సూపర్‌స్టార్, పాన్ ఇండియా హీరో యశ్ తన రాబోయే చిత్రం 'రామాయణ' గురించి ఆసక్తికర వ్యాఖ్యలు చేశారు. 'సినిమాకాన్ 2026' ఈవెంట్‌లో పాల్గొన్న ఆయన, రామాయణ గాథకు ఉన్న ప్రత్యేకతను వివరించారు. ఈ ప్రతిష్ఠాత్మక చిత్రంలో యశ్ రావణుడి పాత్రలో నటిస్తుండటం విశేషం.

ఈ సందర్భంగా యశ్ మాట్లాడుతూ, "'రామాయణం'లో చాలా కాలం పాటు గుర్తుండిపోయే ఒక బలమైన అంశం ఉంది. ఈ కథ ఎన్నో ఏళ్లుగా నిలవడమే కాకుండా, సరిహద్దులు, సంస్కృతులకు అతీతంగా ప్రజల మనసుల్లో నిలిచిపోయిందంటే దానిలో విశ్వవ్యాప్త ఆకర్షణ ఉందని అర్థం" అని అన్నారు. "ప్రస్తుత ఆధునిక టెక్నాలజీతో ఈ కథను వెండితెరపై చూస్తే, ప్రేక్షకులకు ఒక కొత్త, లీనమయ్యే అనుభూతి కలుగుతుంది" అని ఆయన అభిప్రాయపడ్డారు.

నితేశ్ తివారీ దర్శకత్వం వహిస్తున్న ఈ చిత్రాన్ని నమిత్ మల్హోత్రా ప్రైమ్ ఫోకస్ స్టూడియోస్, ఆస్కార్ విన్నింగ్ సంస్థ డీఎన్ఈజీ, యశ్‌కు చెందిన మాన్‌స్టర్ మైండ్ క్రియేషన్స్ సంయుక్తంగా నిర్మిస్తున్నాయి. ఈ సినిమాలో రణ్‌బీర్ కపూర్ రాముడిగా నటిస్తుండగా, సాయి పల్లవి, సన్నీ డియోల్, రవి దూబే కీలక పాత్రలు పోషిస్తున్నారు. స్వరమాంత్రికుడు ఏ.ఆర్. రెహమాన్, హాలీవుడ్ సంగీత దర్శక దిగ్గజం హాన్స్ జిమ్మెర్ సంగీతం అందిస్తున్నారు.

ఇటీవల ఈ చిత్రంలోని రణ్‌బీర్ కపూర్ ఫస్ట్ లుక్‌కు సంబంధించిన వీఎఫ్ఎక్స్‌పై సోషల్ మీడియాలో విమర్శలు వచ్చాయి. రెండు భాగాలుగా రానున్న ఈ సినిమా తొలి భాగం 2026 దీపావళికి, రెండో భాగం 2027 దీపావళికి ఐమ్యాక్స్ ఫార్మాట్‌లో ప్రపంచవ్యాప్తంగా విడుదల కానుంది.