నాపై నమ్మకంతో మరోసారి పదవి అప్పగించిన ముఖ్యమంత్రికి ధన్యవాదాలు: పల్లా శ్రీనివాసరావు

తెలుగుదేశం పార్టీ ఆంధ్రప్రదేశ్ రాష్ట్ర అధ్యక్షుడిగా పల్లా శ్రీనివాసరావు మరోసారి నియమితుడయ్యారు. తనపై నమ్మకంతో రెండోసారి ఈ కీలక బాధ్యతలు అప్పగించినందుకు ముఖ్యమంత్రి, టీడీపీ అధినేత చంద్రబాబుకు ఆయన హృదయపూర్వక కృతజ్ఞతలు తెలిపారు. అదే సమయంలో, పార్టీ జాతీయ వర్కింగ్ ప్రెసిడెంట్‌గా నారా లోకేశ్ నియామకం పట్ల హర్షం వ్యక్తం చేశారు. ఈ మేరకు బుధవారం ఆయన అమరావతి నుంచి ఒక పత్రికా ప్రకటన విడుదల చేశారు.

ఒక బీసీ బిడ్డగా తనకు ఈ స్థాయిలో గుర్తింపు లభించడం చంద్రబాబు దూరదృష్టికి, బీసీల పట్ల ఆయనకున్న చిత్తశుద్ధికి నిదర్శనమని పల్లా శ్రీనివాసరావు పేర్కొన్నారు. కార్యకర్తల సంక్షేమమే లక్ష్యంగా, సీనియర్ల అనుభవాన్ని గౌరవిస్తూనే యువతను ప్రోత్సహిస్తామని తెలిపారు. భవిష్యత్ తరాలకు టీడీపీని ఒక తిరుగులేని రాజకీయ శక్తిగా తీర్చిదిద్దుతామని ఆయన భరోసా ఇచ్చారు.

పార్టీ జాతీయ వర్కింగ్ ప్రెసిడెంట్‌గా నారా లోకేశ్ బాధ్యతలు చేపట్టడం టీడీపీ చరిత్రలో ఒక సువర్ణ అధ్యాయమని పల్లా అభివర్ణించారు. తన పనితీరుతో క్షేత్రస్థాయి యంత్రాంగాన్ని, యువతరాన్ని ఏకతాటిపైకి తెచ్చిన లోకేశ్... రాబోయే రోజుల్లో పార్టీని మరిన్ని విజయాల వైపు నడిపిస్తారని ధీమా వ్యక్తం చేశారు. ఆయన నియామకం పార్టీ నవశకానికి వారధిగా నిలుస్తుందన్నారు.

టీడీపీలో కార్యకర్తే అధినేత అని ఈ నియామకాలతో మరోసారి రుజువైందని పల్లా శ్రీనివాసరావు అన్నారు. సామాన్య మండల స్థాయి అధ్యక్షులకు సైతం అత్యున్నత కమిటీ అయిన పోలిట్ బ్యూరోలో స్థానం కల్పించడం అభినందనీయమన్నారు. జాతీయ, రాష్ట్ర కమిటీల్లో కొత్తగా నియమితులైన నాయకులందరికీ ఆయన శుభాకాంక్షలు తెలిపారు. వారి నియామకం వారి శ్రమకు, నిబద్ధతకు దక్కిన గుర్తింపు అని కొనియాడారు. ప్రభుత్వ కార్యక్రమాలను ప్రజల్లోకి బలంగా తీసుకెళ్లి, పార్టీని అన్ని స్థాయిల్లో మరింత బలోపేతం చేయాలని ఆయన ఆకాంక్షించారు.