టీసీఎస్‌లో మత మార్పిడి కలకలం.. వెలుగులోకి విస్తుపోయే నిజాలు!

ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్‌) నాసిక్ బ్రాంచ్‌లో మత మార్పిడి, లైంగిక వేధింపులకు సంబంధించిన ఆరోపణలు తీవ్ర సంచలనం సృష్టిస్తున్నాయి. కొత్తగా చేరిన ఉద్యోగులను లక్ష్యంగా చేసుకుని ఓ ముఠా ఈ కార్యకలాపాలు సాగిస్తోందన్న ఆరోపణలపై పోలీసులు దర్యాప్తు చేపట్టారు. ఈ కేసుకు సంబంధించి హెచ్‌ఆర్ మేనేజర్‌తో సహా ఏడుగురిని అరెస్ట్ చేశారు. నిందితులు ఒక పక్కా ప్రణాళికతో ఈ కుట్రను నడిపినట్లు పోలీసు వర్గాలు వెల్లడించాయి.

పోలీసుల దర్యాప్తు ప్రకారం... నిందితులు శిక్షణా బృందంలో సభ్యులుగా ఉంటూ కొత్తగా చేరిన ఉద్యోగుల వివరాలు సేకరించేవారు. ఆర్థికంగా బలహీనంగా ఉన్న, కుటుంబ సమస్యలు ఎదుర్కొంటున్న వారిని లక్ష్యంగా చేసుకునేవారు. శిక్షణా సమయంలో హిందూ దేవుళ్లు, దేవతలపై కించపరిచేలా వ్యాఖ్యలు చేసి, వారిని మానసికంగా కలవరపరిచేవారు. ఆ తర్వాత, నిందితుల్లో ఒకరైన హెచ్‌ఆర్ మేనేజర్ నిదా ఖాన్ బాధిత ఉద్యోగులను సంప్రదించి, సానుభూతి నటిస్తూ వారి నమ్మకాన్ని చూరగొనేవారు. క్రమంగా వారి జీవనశైలి, ఆహార్యం మార్చుకునేలా ప్రేరేపించేవారని తేలింది. వీరి ప్రభావంతో ఓ మహిళా ఉద్యోగి తన కుటుంబంతో గొడవపడి, ఇంట్లో ఉన్న దేవుడి ఫొటోలను తొలగించినట్లు అధికారులు గుర్తించారు.

అండర్‌కవర్ ఆపరేషన్‌తో టీసీఎస్ రాకెట్ గుట్టురట్టు
ఈ కుట్రను ఛేదించేందుకు పోలీసులు ఒక అండర్‌కవర్ ఆపరేషన్ నిర్వహించారు. మహిళా కానిస్టేబుళ్లు హౌస్‌కీపింగ్ సిబ్బందిగా మారువేషంలో ఆఫీసు ప్రాంగణంలోకి ప్రవేశించి, నిందితుల కార్యకలాపాలపై నిఘా పెట్టారు. ఈ ఆపరేషన్ ద్వారా ఆరోపణలను నిర్ధారించుకున్న తర్వాతే అరెస్టులు చేసినట్లు పోలీసు వర్గాలు తెలిపాయి. నిందితులు 'టార్గెట్‌ల' గురించి చర్చించుకునేందుకు, మతపరమైన తీవ్రవాద అంశాలపై మాట్లాడుకునేందుకు ఒక వాట్సాప్ గ్రూప్‌ను కూడా నడిపినట్లు దర్యాప్తులో వెల్లడైంది.

ఈ కేసులో అసిఫ్ అన్సారీ, షఫీ షేక్, షారుఖ్ ఖురేషీ, రజా మెమన్, తౌసిఫ్ అత్తర్‌లతో పాటు మరో ఇద్దరిని అరెస్ట్ చేశారు. ఈ వ్యవహారంపై ఏర్పాటైన ప్రత్యేక దర్యాప్తు బృందం (సిట్), తెరపైకి వస్తున్న లైంగిక వేధింపుల ఆరోపణలపైనా విచారణ జరుపుతోంది.