హెల్త్‌కేర్ కంపెనీలకు క్యూ4లో మిశ్రమ ఫలితాలు.. ఆదాయం పెరిగినా లాభాల డౌన్!

భారత ఆరోగ్య సంరక్షణ (హెల్త్‌కేర్) రంగంలోని కంపెనీలకు గత ఆర్థిక సంవత్సరం (FY26) నాలుగో త్రైమాసికం (Q4) మిశ్రమ ఫలితాలను అందించనుంది. ఈ త్రైమాసికంలో కంపెనీల ఆదాయంలో అధిక సింగిల్-డిజిట్ వృద్ధి నమోదయ్యే అవకాశం ఉన్నప్పటికీ, వాటి లాభదాయకత, నికర ఆదాయం గణనీయంగా క్షీణించవచ్చని ప్రముఖ అనలిటిక్స్ సంస్థ 'సిస్టమాటిక్స్' తన నివేదికలో వెల్లడించింది.

నివేదిక అంచనాల ప్రకారం, ఫార్మా కంపెనీల ఆదాయంలో సగటున 12 శాతం వృద్ధి కనిపించినా, ఎబిటా (EBITDA)లో కేవలం 3.6 శాతం పెరుగుదల మాత్రమే ఉంటుంది. ఇక నికర లాభాల్లో ఏకంగా 14 శాతం క్షీణత నమోదయ్యే అవకాశం ఉంది. ఇందుకు ప్రధాన కారణం క్యాన్సర్ చికిత్సలో వాడే 'జెనరిక్ రెవ్లిమిడ్' (gRevlimid) అనే ఔషధంపై పలు భారతీయ కంపెనీలు ప్రత్యేక హక్కులను (exclusivity) కోల్పోవడమే. దీని ప్రభావం ముఖ్యంగా డాక్టర్ రెడ్డీస్, జైడస్, సిప్లా, సన్ ఫార్మా వంటి దిగ్గజ సంస్థలపై స్పష్టంగా కనిపించనుంది.

ఇదే సమయంలో, లాన్రియోటైడ్ అనే మరో ఔషధం సరఫరాలో అంతరాయాల కారణంగా సిప్లా మరిన్ని ఇబ్బందులు ఎదుర్కోవచ్చని నివేదిక పేర్కొంది. అలాగే, మిరాబెగ్రాన్ సంబంధిత రాయల్టీ చెల్లింపుల వల్ల లూపిన్, జైడస్ కంపెనీల మార్జిన్లపై ఒత్తిడి పెరగవచ్చని అంచనా వేసింది. అన్నింటికంటే ముఖ్యంగా, డాక్టర్ రెడ్డీస్ ఆదాయంలో జెనరిక్ రెవ్లిమిడ్ వాటా అధికంగా ఉన్నందున, ఆ సంస్థ లాభాల్లో అత్యంత భారీ క్షీణత నమోదయ్యే ప్రమాదం ఉందని హెచ్చరించింది.

మరోవైపు, అమెరికా-ఇరాన్ మధ్య కొనసాగుతున్న ఉద్రిక్తతల ప్రభావం కూడా ఈ రంగంపై పడనుంది. రవాణా ఛార్జీలు, ముడిసరుకుల ధరలు పెరగడం ప్రతికూలంగా మారితే, డాలర్‌తో రూపాయి మారకం విలువ అనుకూలంగా ఉండటం కొంత ఉపశమనం కలిగించవచ్చు. ఈ ఉద్రిక్తతలు ఇలాగే కొనసాగితే, ముడిసరుకుల ధరల భారాన్ని ఏపీఐ (యాక్టివ్ ఫార్మాస్యూటికల్ ఇంగ్రీడియంట్) తయారీదారులు ఫార్ములేషన్ కంపెనీలకు బదిలీ చేసే అవకాశం ఉంది.

బరువు తగ్గే మందులపై ప్రభుత్వ నిఘా

ఇదిలా ఉండగా, దేశంలో వేగంగా ప్రాచుర్యం పొందుతున్న బరువు తగ్గించే (weight-loss), డయాబెటిస్ మందులపై భారత ఔషధ నియంత్రణ సంస్థలు నిఘాను కట్టుదిట్టం చేస్తున్నాయి. ముఖ్యంగా జీఎల్‌పీ-1 రిసెప్టర్ అగోనిస్ట్స్ వంటి థెరపీలకు డిమాండ్ పెరగడం, త్వరలో చౌకైన జెనరిక్ వెర్షన్లు మార్కెట్లోకి రానుండటంతో ఈ చర్యలు చేపట్టారు. కేంద్ర ఆరోగ్య మంత్రిత్వ శాఖ ఆధ్వర్యంలోని ఇండియన్ ఫార్మకోపియా కమిషన్ (IPC), ఈ మందుల వల్ల కలిగే దుష్ప్రభావాలపై వచ్చే నివేదికలను విశ్లేషించే బాధ్యతను చేపట్టింది. మార్కెట్లోకి వచ్చాక కూడా మందుల భద్రతను పర్యవేక్షించడం, ఏవైనా సమస్యలుంటే వెంటనే గుర్తించడం దీని లక్ష్యమని అధికారులు తెలిపారు.