వాంఖడేలో రవిశాస్త్రి పేరుతో స్టాండ్... ఇదే నా కర్మభూమి అంటూ భావోద్వేగం

భారత క్రికెట్ దిగ్గజం రవిశాస్త్రికి అరుదైన గౌరవం లభించింది. ముంబైలోని ప్రఖ్యాత వాంఖడే స్టేడియంలో ఆయన పేరు మీద గురువారం నాడు ఒక స్టాండ్‌ను ఆవిష్కరించారు. ఈ గౌరవం పట్ల రవిశాస్త్రి భావోద్వేగంగా స్పందించాడు. వాంఖడే తన 'కర్మభూమి' అని, తన క్రికెట్ ప్రస్థానం ఇక్కడి నుంచే ప్రారంభమైందని పేర్కొన్నాడు.

ముంబై క్రికెట్ అసోసియేషన్ (ఎంసీఏ) ఆధ్వర్యంలో ఈ కార్యక్రమం జరిగింది. ముంబై, భారత క్రికెట్‌కు చేసిన సేవలకు గాను రవిశాస్త్రితో పాటు దిగ్గజ క్రీడాకారులు దిలీప్ సర్దేశాయ్, ఏక్‌నాథ్ సోల్కర్, డయానా ఎడుల్జీలను కూడా ఎంసీఏ ఘనంగా సత్కరించింది. ప్రెస్ బాక్స్ కింద ఉన్న లెవల్ 1 స్టాండ్‌కు 'రవిశాస్త్రి స్టాండ్' అని పేరు పెట్టారు. అలాగే, స్టేడియంలోని 3, 6, 5 గేట్లకు వరుసగా దిలీప్ సర్దేశాయ్, ఏక్‌నాథ్ సోల్కర్, డయానా ఎడుల్జీ గేట్లుగా నామకరణం చేశారు.

దీనిపై రవిశాస్త్రి ఎక్స్ లో స్పందిస్తూ, "నా కర్మభూమి అయిన వాంఖడేలో నా పేరుతో స్టాండ్ ఉండటం చాలా ప్రత్యేకమైన గౌరవం. ఇక్కడే నా ప్రయాణం మొదలైంది. ఈ సమయంలో మా నాన్నను చాలా మిస్ అవుతున్నాను. కానీ, ఈ క్షణాన్ని చూసేందుకు మా అమ్మ, కుటుంబ సభ్యులు ఇక్కడ ఉన్నందుకు సంతోషంగా ఉంది" అని పోస్ట్ చేశాడు.

మహారాష్ట్ర ముఖ్యమంత్రి దేవేంద్ర ఫడ్నవీస్ చేతుల మీదుగా ఈ స్టాండ్, గేట్లను ఆవిష్కరించారు. ఈ కార్యక్రమానికి సునీల్ గవాస్కర్, దిలీప్ వెంగ్‌సర్కార్‌తో పాటు ఎంసీఏ అధ్యక్షుడు అజింక్య నాయక్, క్యాబినెట్ మంత్రి ఆశిష్ షెలార్, ఇతర ప్రముఖులు హాజరయ్యారు. ఈ గొప్ప గౌరవానికి ముఖ్యమంత్రి ఫడ్నవీస్, ఎంసీఏకు రవిశాస్త్రి తన కృతజ్ఞతలు తెలిపారు.