పాకిస్థాన్‌ను నమ్మలేం.. ఇరాన్-అమెరికా చర్చలపై ఇజ్రాయెల్ సంచలన వ్యాఖ్యలు

అమెరికా, ఇరాన్ మధ్య జరుగుతున్న కాల్పుల విరమణ చర్చల్లో పాకిస్థాన్ పోషిస్తున్న మధ్యవర్తి పాత్రపై ఇజ్రాయెల్ అనుమానాలు వ్యక్తం చేసింది. పాకిస్థాన్‌ను విశ్వసనీయమైన మధ్యవర్తిగా తాము పరిగణించడం లేదని భారత్‌లో ఇజ్రాయెల్ రాయబారి రూవెన్ అజార్ కుండబద్దలు కొట్టారు. అమెరికా తన సొంత కారణాలతో పాకిస్థాన్ సేవలను ఉపయోగించుకుంటుండవచ్చని, కానీ టెల్ అవీవ్ మాత్రం ఈ విషయంలో పాక్‌ను నమ్మడం లేదని ఆయన స్పష్టం చేశారు.

గతంలో ట్రంప్ హయాంలో గాజాలో కాల్పుల విరమణ కోసం ఖతార్, టర్కీ వంటి సమస్యాత్మక దేశాలతో పనిచేసిన తరహాలోనే ఇప్పుడు పాకిస్థాన్ విషయంలోనూ జరుగుతోందని అజార్ అభిప్రాయపడ్డారు. అమెరికాతో కలిసి తాము ఆశించిన ఫలితాలను సాధించడంపైనే ప్రధానంగా దృష్టి సారిస్తామని ఆయన తెలిపారు.

ఇరాన్‌తో కాల్పుల విరమణకు, లెబనాన్‌లోని హిజ్బుల్లా ఉగ్రవాదులపై తమ పోరాటానికి మధ్య తేడా ఉందని అజార్ స్పష్టం చేశారు. "లెబనాన్ విషయంలో మా లక్ష్యం చాలా స్పష్టంగా ఉంది. దక్షిణ లెబనాన్‌ను హిజ్బుల్లా ఉగ్రవాద మౌలిక సదుపాయాల నుంచి పూర్తిగా తుడిచిపెట్టేయాలి. ఇది లెబనాన్ ప్రభుత్వ బాధ్యత" అని ఆయన అన్నారు. గత కొన్ని గంటల్లో ఇజ్రాయెల్ వైమానిక దళం లెబనాన్‌లో భారీ ఆపరేషన్ నిర్వహించి, 250 మందికి పైగా హిజ్బుల్లా ఉగ్రవాదులను మట్టుబెట్టిందని ఆయన వెల్లడించారు. తమ ఉత్తర సరిహద్దులను హిజ్బుల్లా దాడుల నుంచి కాపాడుకునే హక్కు తమకు ఉందని ఆయన పునరుద్ఘాటించారు.

అదే సమయంలో, ఇరాన్‌తో అమెరికా చేస్తున్న చర్చలకు ఇజ్రాయెల్ మద్దతు ఇస్తోందని అజార్ చెప్పారు. ఇరాన్ అణు కార్యక్రమం, బాలిస్టిక్ క్షిపణి ఉత్పత్తి వంటి రెండు ప్రధాన ముప్పులను ఈ చర్చలు తొలగిస్తాయని తాము ఆశిస్తున్నట్లు ఆయన పేర్కొన్నారు. ఇదిలా ఉండగా, లెబనాన్‌పై ఇజ్రాయెల్ దాడుల వల్ల ఈ ఒప్పందం దెబ్బతినే ప్రమాదం ఉందని ఇరాన్ హెచ్చరించింది. అయితే, ఈ కాల్పుల విరమణ ఒప్పందంలో లెబనాన్‌కు సంబంధం లేదని అమెరికా, ఇజ్రాయెల్ గతంలోనే స్పష్టం చేశాయి.