స్వయంగా కిచెన్‌లోకి వెళ్లి కిచిడీ నేర్పిన మోదీ.. ఎప్పుడు, ఎక్కడంటే?

ప్రధాన మంత్రి నరేంద్ర మోదీకి ఆహారంలో కిచిడీ అంటే చాలా ఇష్టమని అందరికీ తెలుసు. అయితే, ఆయన కేవలం కిచిడీ తినడమే కాదు, దాన్ని ఎలా వండాలో కూడా నేర్పిస్తారని చాలా తక్కువ మందికి తెలుసు. ముఖ్యంగా సగ్గుబియ్యం కిచిడీ తయారీలో తనకున్న నైపుణ్యాన్ని ఓ మహిళకు స్వయంగా నేర్పిన ఆసక్తికర ఘటన ఒకటి వెలుగులోకి వచ్చింది.

1997లో నవరాత్రి సమయంలో ఈ ఘటన జరిగింది. అప్పుడు హిమాచల్ ప్రదేశ్‌ బీజేపీ వ్యవహారాల ఇన్‌చార్జ్‌గా ఉన్న మోదీ, షిమ్లాలోని పీటర్‌హాఫ్ హోటల్‌లో బస చేశారు. స్థానిక బీజేపీ నేత దీపక్ శర్మ భార్య సీమా శర్మ, మోదీ కోసం కిచిడీ వండారు. కానీ అది ఆయనకు అంతగా నచ్చలేదు. దీంతో మోదీ స్వయంగా వంటగదిలోకి వెళ్లి, రుచికరమైన సగ్గుబియ్యం కిచిడీని ఎలా తయారు చేయాలో ఆమెకు నేర్పించారు.

ఆ నాటి నుంచి తాను మోదీ నేర్పిన పద్ధతిలోనే కిచిడీ వండుతున్నానని సీమా శర్మ పలు సందర్భాల్లో గుర్తుచేసుకున్నారు. రాజకీయాల్లోకి రాకముందు దాల్ కిచిడీ వండుకునేవాడినని మోదీ కూడా పలు సందర్భాల్లో చెప్పారు. ఇక సగ్గుబియ్యం ఆరోగ్యానికి ఎంతో మేలు చేస్తుంది. ఇది తేలికగా జీర్ణమవడంతో పాటు, గ్లూటెన్ రహితం కావడం వల్ల చాలామందికి అనువైన ఆహారం. ఇందులో ఉండే పొటాషియం రక్తపోటును నియంత్రించడంలో సహాయపడుతుంది.

సగ్గుబియ్యంతో కిచిడీనే కాకుండా వడ, ఉప్మా, పాయసం వంటి అనేక రకాల వంటకాలు తయారు చేసుకోవచ్చు. వ్రతాల సమయంలో, సాధారణ రోజుల్లోనూ దీన్ని ఎక్కువగా వినియోగిస్తుంటారు. ప్రధాని నేర్పిన ఈ వంటకం కథ మాత్రం ఎందరికో స్ఫూర్తినిస్తోంది.