Satya Kumar Yadav: ఏపీలో 482 మంది డాక్టర్లకు కొలువులు.. 15 రోజుల్లోగా విధుల్లో చేరాలని ఆదేశం

ఆంధ్రప్రదేశ్‌లో వైద్య రంగాన్ని బలోపేతం చేసే దిశగా ప్రభుత్వం కీలక చర్యలు చేపట్టింది. రాష్ట్రవ్యాప్తంగా 482 మంది వైద్యులకు రెగ్యులర్ ప్రాతిపదికన నియామక ఉత్తర్వులను జారీ చేసినట్లు వైద్య, ఆరోగ్య శాఖ మంత్రి సత్యకుమార్ యాదవ్ నిన్న ఒక ప్రకటనలో వెల్లడించారు. ఉత్తర్వులు అందుకున్న వారు 15 రోజుల్లోగా తమకు కేటాయించిన విధుల్లో చేరాలని ఆయన సూచించారు.

గత ఏడాది విడుదల చేసిన నోటిఫికేషన్‌కు అనుగుణంగా ఈ నియామకాలు జరిగాయి. ప్రాథమిక ఆరోగ్య కేంద్రాల్లో (పీహెచ్‌సీ) మెడికల్ ఆఫీసర్లు, బోధనాసుపత్రుల్లో ట్యూటర్ల వంటి మొత్తం 636 ఖాళీల భర్తీకి ఈ ప్రక్రియను చేపట్టారు. ఎటువంటి అవకతవకలకు ఆస్కారం లేకుండా, పూర్తిగా పారదర్శకంగా ఆన్‌లైన్ కౌన్సెలింగ్ ద్వారా పోస్టింగులు కేటాయించడం గమనార్హం.

ఈ పోస్టుల కోసం దాదాపు 5,000 మంది ఎంబీబీఎస్ అభ్యర్థులు దరఖాస్తు చేసుకోగా, రిజర్వేషన్ నిబంధనలను అనుసరించి తుది జాబితాను సిద్ధం చేశారు. ఆన్‌లైన్ కౌన్సెలింగ్‌లో 611 పోస్టులకు గాను 482 మంది అభ్యర్థులు తమ ఐచ్ఛికాలను (వెబ్ ఆప్షన్లు) ఎంచుకున్నారు. వారికి తక్షణమే నియామక ఉత్తర్వులను జారీ చేశారు.

డైరెక్టర్ ఆఫ్ పబ్లిక్ హెల్త్ (డీపీహెచ్) వెల్లడించిన వివరాల ప్రకారం, అత్యధికంగా కడప జిల్లాకు 52 మంది వైద్యులను కేటాయించారు. ఆ తర్వాతి స్థానాల్లో అనంతపురం (34), శ్రీకాకుళం (31), కాకినాడ (29), కర్నూలు (27) జిల్లాలు ఉన్నాయి. స్పోర్ట్స్ మరియు మాజీ సైనికోద్యోగుల కోటా కింద మిగిలి ఉన్న మరో 19 పోస్టులను కూడా త్వరలోనే భర్తీ చేయనున్నట్లు అధికారులు తెలిపారు.