భారత మార్కెట్‌పై యుద్ధ మేఘాలు.. 50 శాతం పెరగనున్న కండోమ్ ధరలు!

పశ్చిమాసియాలో కొనసాగుతున్న ఉద్రిక్తతలు ఇప్పుడు భారతీయ కుటుంబాలపై ప్రత్యక్ష ప్రభావాన్ని చూపబోతున్నాయి. దేశంలోని రూ. 8,170 కోట్ల కండోమ్ తయారీ పరిశ్రమ తీవ్రమైన సరఫరా సంక్షోభాన్ని ఎదుర్కొంటోంది. దీని ఫలితంగా కండోమ్‌ల ధరలు 50 శాతం వరకు పెరగవచ్చని, మార్కెట్‌లో తీవ్ర కొరత ఏర్పడే ప్రమాదం ఉందని నిపుణులు హెచ్చరిస్తున్నారు.

ఈ కొరతకు పెరిగిన డిమాండ్ కారణం కాదు. యుద్ధం కారణంగా సముద్ర వాణిజ్య మార్గాలకు అంతరాయం కలగడం, ఉత్పత్తికి అవసరమైన పెట్రోకెమికల్స్, లూబ్రికెంట్ల సరఫరా నిలిచిపోవడమే ప్రధాన కారణాలుగా ఉన్నాయి. దేశంలో ఏటా 400 కోట్లకు పైగా కండోమ్‌లను ఉత్పత్తి చేసే హెచ్‌ఎల్‌ఎల్ లైఫ్‌కేర్ లిమిటెడ్, మ్యాన్‌కైండ్ ఫార్మా వంటి ప్రధాన సంస్థలు ఇప్పుడు సవాళ్లను ఎదుర్కొంటున్నాయి.

కండోమ్ తయారీలో కీలకమైన సిలికాన్ ఆయిల్, అమ్మోనియా వంటి ముడిసరుకుల కొరత ఏర్పడింది. అమ్మోనియా ధరలు 40-50 శాతం పెరిగే అవకాశం ఉండగా, ప్యాకేజింగ్ మెటీరియల్ ఖర్చులు కూడా విపరీతంగా పెరిగాయి. పీవీసీ ఫాయిల్, అల్యూమినియం ఫాయిల్ వంటి వాటి సరఫరాలో పరిమితులు ఉత్పత్తిపై ప్రభావం చూపుతున్నాయని ఓ కండోమ్ తయారీ సంస్థ అధికారి ఒకరు తెలిపారు.

అధిక పరిమాణం, తక్కువ లాభం ప్రాతిపదికన పనిచేసే భారత కండోమ్ మార్కెట్‌పై ఈ సంక్షోభం తీవ్ర ఒత్తిడిని పెంచుతోంది. మరోవైపు, ఇంధన అవసరాలకు ప్రాధాన్యం ఇచ్చేందుకు పెట్రోకెమికల్ యూనిట్లకు వనరుల కేటాయింపులో 35 శాతం వరకు కోత విధించవచ్చని ప్రభుత్వ సమావేశంలో సంకేతాలు రావడం పరిశ్రమ వర్గాలను మరింత ఆందోళనకు గురిచేస్తోంది.

ఈ పరిణామాలు ప్రజారోగ్యంపై తీవ్ర ప్రభావం చూపిస్తాయని నిపుణులు ఆందోళన వ్యక్తం చేస్తున్నారు. కుటుంబ నియంత్రణ, లైంగిక వ్యాధుల నివారణలో కండోమ్‌లు కీలక పాత్ర పోషిస్తాయి. వాటి ధరలు పెరగడం లేదా లభ్యత తగ్గడం దీర్ఘకాలిక సామాజిక సమస్యలకు దారితీయవచ్చు. ఇప్పటికే ముంబై, ఢిల్లీ వంటి నగరాల్లోని ఫార్మసీలలో సరఫరా అంతరాయాలు కనిపిస్తున్నాయి.