Artemis-2: నింగిలోకి దూసుకెళ్లిన 'ఆర్టెమిస్-2'.. 50 ఏళ్ల తర్వాత తొలిసారిగా చంద్రుడి వైపు మానవసహిత యాత్ర

అర్ధ శతాబ్దం తర్వాత తొలిసారిగా మానవులు చంద్రుడి వైపు పయనమయ్యారు. అమెరికా అంతరిక్ష పరిశోధన సంస్థ (నాసా) ప్రతిష్ఠాత్మకంగా చేపట్టిన 'ఆర్టెమిస్-2' మిషన్ విజయవంతంగా నింగిలోకి దూసుకెళ్లింది. నలుగురు వ్యోమగాములతో కూడిన ఈ వ్యోమనౌక, ఫ్లోరిడాలోని కెన్నెడీ స్పేస్ సెంటర్ నుంచి బుధవారం స్థానిక కాలమానం ప్రకారం సాయంత్రం 6:35 గంటలకు బయలుదేరింది.

ఏళ్ల తరబడి జాప్యం, భారీ వ్యయ ప్రయాసల తర్వాత ఈ చరిత్రాత్మక ఘట్టం ఆవిష్కృతమైంది. ఆరెంజ్, తెలుపు రంగుల్లో ఉన్న భారీ రాకెట్ తీవ్రమైన శబ్దంతో నింగిలోకి దూసుకెళ్తుండగా, నాసా బృందాలు, అక్కడికి చేరుకున్న ప్రేక్షకులు హర్షధ్వానాలతో తమ ఆనందాన్ని వ్యక్తం చేశారు. ఈ యాత్రలో అమెరికాకు చెందిన రీడ్ వైస్‌మన్, విక్టర్ గ్లోవర్, క్రిస్టినా కోచ్‌లతో పాటు కెనడాకు చెందిన జెరెమీ హాన్సెన్ ఉన్నారు.

సుమారు 10 రోజుల పాటు సాగే ఈ ప్రయాణంలో వ్యోమగాములు చంద్రుడిపై దిగరు. కేవలం జాబిల్లి చుట్టూ ప్రదక్షిణ చేసి తిరిగి వస్తారు. మానవులతో ఈ వ్యోమనౌక ప్రయాణించడం ఇదే తొలిసారి కావడంతో దాని భద్రత, పనితీరు, విశ్వసనీయతను ఈ యాత్రలో పరీక్షిస్తారు. ప్రయోగానికి ముందు వ్యోమగామి జెరెమీ హాన్సెన్ మాట్లాడుతూ.. "మేము సమస్త మానవాళి కోసం వెళుతున్నాం" అని అన్నారు. ఆర్టెమిస్ లాంచ్ డైరెక్టర్ చార్లీ బ్లాక్‌వెల్-థాంప్సన్ వ్యోమగాములకు శుభాకాంక్షలు తెలుపుతూ, ఈ యాత్ర నూతన తరం ఆశలు, కలలను మోసుకెళ్తోందని అభివర్ణించారు.