R Madhavan: 'రఫేల్'పై మాధవన్ పాత ట్వీట్లు ఇప్పుడు వైరల్!

 ప్రముఖ నటుడు ఆర్. మాధవన్ దశాబ్దం క్రితం చేసిన కొన్ని పాత ట్వీట్లు ప్రస్తుతం సోషల్ మీడియాలో వైరల్ అవుతున్నాయి. భారత వైమానిక దళం కోసం ఫ్రాన్స్‌కు చెందిన రఫేల్ యుద్ధ విమానాలనే ఎంచుకోవాలని, ఆ విమానాలు భారత్ అవసరాలకు సరిపోతాయని ఆయన 2011లోనే సూచించారు. దీంతో ఆయనకున్న రక్షణ రంగ పరిజ్ఞానాన్ని చూసి నెటిజన్లు ప్రశంసలు కురిపిస్తున్నారు.

2011 డిసెంబర్ 10న మాధవన్ ఈ ట్వీట్లు చేశారు. ఎఫ్-18, యూరోఫైటర్ టైఫూన్ వంటి ఇతర విమానాలతో పోలిస్తే రఫేల్ అత్యుత్తమమని ఆయన అభిప్రాయపడ్డారు. "రఫేల్ అత్యంత చురుకైనది, సులభంగా నడిపేలా ఉంటుంది. ఎస్ యూ-30 విమానాలతో దీని కాంబినేషన్ అద్భుతంగా ఉంటుంది" అని ఆయన పేర్కొన్నారు. భారత్ 2016లో ఫ్రాన్స్‌తో రఫేల్ ఒప్పందం చేసుకోగా, తొలి విమానాలు 2020లో అందాయి. అంటే, ఒప్పందానికి ఐదేళ్ల ముందే మాధవన్ ఈ సూచన చేయడం విశేషం.

ఆయన నటించిన 'ధురంధర్' చిత్రంలో జాతీయ భద్రతా సలహాదారు పాత్రలో కనిపించడంతో ఈ పాత ట్వీట్లకు మరింత ప్రాధాన్యత ఏర్పడింది. "అసలు 'భారత రక్షణ శాఖ ట్విట్టర్ లో లేని రోజుల్లోనే మాధవన్ దాన్ని నిర్వహించారు" అని ఒకరు, "ధురంధర్ పాత్రకు ఆయన ఎప్పటినుంచో సిద్ధమవుతున్నారు" అని మరొకరు సరదాగా కామెంట్ చేశారు.

కాగా, నటనకు రాకముందు మాధవన్ సైన్యంలో చేరాలని ఆశించారు. ఎన్‌సీసీ క్యాడెట్‌గా ఇంగ్లాండ్‌లో బ్రిటిష్ ఆర్మీ, నేవీ, ఎయిర్ ఫోర్స్‌తో శిక్షణ కూడా పొందారు. ఈ నేపథ్యంలో, ఆయన కేవలం నటుడే కాదని, దేశ భద్రతపై కూడా లోతైన అవగాహన ఉన్న వ్యక్తి అని ఈ ట్వీట్లు నిరూపిస్తున్నాయి.