ఎమ్మెల్సీ అనంతబాబు భార్యపై నాన్ బెయిలబుల్ వారెంట్ రద్దు

వైసీపీ ఎమ్మెల్సీ అనంతబాబు భార్య లక్ష్మీదుర్గకు డ్రైవర్ వీధి సుబ్రహ్మణ్యం హత్య కేసులో జిల్లా కోర్టులో ఊరట లభించింది. ఈ కేసులో ఆమెపై జారీ అయిన నాన్ బెయిలబుల్ అరెస్టు వారెంట్‌ను న్యాయస్థానం రద్దు చేసింది. అయితే, ఈ ఉపశమనాన్ని పలు షరతులకు లోబడి మంజూరు చేసింది.

తనపై జారీ చేసిన వారెంట్‌ను రద్దు చేయాలని కోరుతూ లక్ష్మీదుర్గ దాఖలు చేసిన పిటిషన్‌పై విచారణ చేపట్టిన జిల్లా ప్రధాన న్యాయమూర్తి గంధం సునీత సోమవారం ఈ తీర్పును వెలువరించారు. వారెంట్‌ను రద్దు చేస్తూనే, ప్రతి 15 రోజులకు ఒకసారి పోలీస్ స్టేషన్‌లో హాజరు కావాలని, అలాగే తన పాస్‌‌పోర్ట్‌ను కోర్టుకు అప్పగించాలని లక్ష్మీదుర్గను ఆదేశించారు.

ఈ సందర్భంగా, హత్యకు గురైన డ్రైవర్ సుబ్రహ్మణ్యం తల్లిదండ్రుల భద్రతపై ప్రత్యేక దృష్టి సారించాలని, వారి రక్షణను వ్యక్తిగతంగా పర్యవేక్షించాలని కాకినాడ జిల్లా ఎస్పీకి న్యాయస్థానం ఆదేశాలు జారీ చేసింది.