Ranveer Singh: చరిత్ర సృష్టించిన 'ధురంధర్ 2'.. వసూళ్లలో సరికొత్త సంచలనం

రణవీర్ సింగ్ నటించిన స్పై యాక్షన్ థ్రిల్లర్ 'ధురంధర్: ది రివెంజ్' బాక్సాఫీస్ వద్ద సరికొత్త సంచలనం సృష్టిస్తోంది. ఈ చిత్రం విడుదలైన కేవలం 11 రోజుల్లోనే తన మొదటి భాగం సాధించిన మొత్తం లైఫ్‌టైమ్ కలెక్షన్లను అధిగమించి చరిత్ర సృష్టించింది. నాలుగు నెలల క్రితం విడుదలైన 'ధురంధర్' మొదటి భాగం ప్రపంచవ్యాప్తంగా రూ. 1,307.35 కోట్లు వసూలు చేయగా, 'ధురంధర్ 2' కేవలం 11 రోజుల్లోనే రూ. 1,363.15 కోట్ల గ్రాస్‌ను రాబట్టింది. ఇందులో భారత్ నుంచి రూ. 1,013.15 కోట్లు రాగా, ఓవర్సీస్ మార్కెట్ల నుంచి రూ. 350 కోట్లు వచ్చాయి. ఈ భారీ వసూళ్లతో 'ధురంధర్ 2' భారత సినీ చరిత్రలోనే అత్యధిక వసూళ్లు సాధించిన నాలుగో చిత్రంగా నిలిచింది. ప్రస్తుతం ఈ జాబితాలో అమీర్ ఖాన్ 'దంగల్' (రూ. 2,070 కోట్లు) అగ్రస్థానంలో ఉండగా, ప్రభాస్ నటించిన 'బాహుబలి 2' (రూ. 1,788 కోట్లు), అల్లు అర్జున్ 'పుష్ప 2' (రూ. 1,742 కోట్లు) వరుసగా రెండు, మూడు స్థానాల్లో ఉన్నాయి.

ఆదిత్య ధర్ దర్శకత్వం వహించిన ఈ చిత్రంలో రణవీర్ సింగ్ అండర్ కవర్ ఏజెంట్‌గా నటించారు. పాకిస్థాన్‌లోని అండర్ వరల్డ్‌లోకి ప్రవేశించి 26/11 దాడులకు ప్రతీకారం తీర్చుకునే భారత గూఢచారి కథ ఇది. సంజయ్ దత్, ఆర్.మాధవన్, అర్జున్ రాంపాల్ కీలక పాత్రల్లో నటించారు. రాబోయే రోజుల్లో పెద్ద హిందీ సినిమాలేవీ లేకపోవడంతో, 'ధురంధర్ 2' వసూళ్ల పరంపర మరికొంత కాలం కొనసాగే అవకాశం ఉందని ట్రేడ్ వర్గాలు అంచనా వేస్తున్నాయి.