వైట్ హౌస్ వీడియోలో ‘రహస్య సందేశం’.. రేపు ఏదో పెద్ద ప్రకటన రాబోతోందా?

అమెరికా అధ్యక్ష భవనం వైట్ హౌస్ తన అధికారిక సోషల్ మీడియా ఖాతాల్లో పోస్ట్ చేసిన ఒక వింత వీడియో తీవ్ర ఉత్కంఠ రేపుతోంది. నేరుగా ఎలాంటి సమాచారం లేని ఈ వీడియో ఆడియోను రివర్స్ చేస్తే, ‘‘రేపు ఒక అద్భుతమైన ప్రకటన ఉండబోతోంది’’ అనే రోబోటిక్ వాయిస్ వినిపిస్తున్నట్లు నెటిజన్లు కనుగొన్నారు. దీంతో రేపు వైట్ హౌస్ నుంచి రాబోయే ప్రకటన ఏమై ఉంటుందా? అని ప్రపంచవ్యాప్తంగా ఆసక్తి నెలకొంది.

గత కొన్ని గంటలుగా వైట్ హౌస్ ఎక్స్, ఇన్‌స్టాగ్రామ్ ఖాతాల్లో ఇలాంటి వింత పోస్టులు దర్శనమిస్తున్నాయి. మొదట ‘‘త్వరలో లాంచ్ అవుతోంది, అవునా?’’ అనే మాటలున్న ఒక వీడియోను పోస్ట్ చేసి, వెంటనే తొలగించారు. ఆ తర్వాత అధ్యక్షుడు డొనాల్డ్ ట్రంప్, ఉపాధ్యక్షుడు జేడీ వాన్స్‌లకు చెందిన పిక్సలేటెడ్ (మసక) చిత్రాలను కూడా ఎలాంటి క్యాప్షన్ లేకుండా షేర్ చేయడం గందరగోళాన్ని మరింత పెంచింది.

ప్రస్తుతం ఇరాన్‌తో యుద్ధ మేఘాలు కమ్ముకున్న నేపథ్యంలో వైట్ హౌస్ నుంచి వెలువడుతున్న ఈ సంకేతాలు ప్రాధాన్యతను సంతరించుకున్నాయి. ఇది ఏదైనా కీలకమైన విదేశాంగ విధాన నిర్ణయమా? లేక సైనిక చర్యకు సంబంధించిన ప్రకటన అయి ఉంటుందా? అనే ఆందోళనలు వ్యక్తమవుతున్నాయి. అయితే, ఇది కేవలం ఏదైనా కొత్త సోషల్ మీడియా ప్రచారంలో భాగమైన టీజర్ కూడా కావచ్చని కొందరు విశ్లేషిస్తున్నారు.

ఈ పోస్టులపై నెలకొన్న సస్పెన్స్‌పై వైట్ హౌస్ ఇప్పటివరకు ఎలాంటి అధికారిక ప్రకటన చేయలేదు. దీంతో అమెరికాతో పాటు అంతర్జాతీయ సమాజం కూడా రేపటి ప్రకటన కోసం ఆసక్తిగా ఎదురుచూస్తోంది.