'ధురంధర్ 2' వసూళ్ల సునామీ.. వారంలోనే రూ.1000 కోట్ల క్లబ్‌లోకి!

బాలీవుడ్ స్టార్ హీరో రణ్‌వీర్ సింగ్ నటించిన 'ధురంధర్ 2' చిత్రం బాక్సాఫీస్ వద్ద సరికొత్త చరిత్ర సృష్టిస్తోంది. విడుదలైన కేవలం ఏడు రోజుల్లోనే ఈ సినిమా ప్రపంచవ్యాప్తంగా రూ. 1000 కోట్ల గ్రాస్ వసూళ్ల మార్కును దాటింది. భారత్‌తో పాటు ఓవర్సీస్‌లోనూ అద్భుతమైన కలెక్షన్లతో దూసుకుపోతూ, అతి వేగంగా ఈ ఘనత సాధించిన చిత్రాల్లో ఒకటిగా నిలిచింది.

ఈ సినిమా ప్రయాణం ఈ నెల‌ 18న పెయిడ్ ప్రివ్యూలతో ప్రారంభమైంది. ప్రివ్యూల ద్వారానే దేశవ్యాప్తంగా రూ. 43 కోట్ల నెట్ వసూలు చేసి సంచనాలకు తెరలేపింది. ఇక తొలి రోజు (Day 1) ఏకంగా రూ. 102.55 కోట్లు రాబట్టి బాక్సాఫీస్ వద్ద తన ఆధిపత్యాన్ని చాటింది. రెండో రోజు శుక్రవారం నాడు స్వల్పంగా తగ్గి రూ. 80.72 కోట్లు వసూలు చేసినా, వారాంతంలో మళ్లీ పుంజుకుంది. శనివారం రూ. 113 కోట్లు, ఆదివారం రూ. 114.85 కోట్లతో అసాధారణ వృద్ధిని నమోదు చేసింది. దీంతో తొలి వారాంతానికే భారత్‌లో నెట్ కలెక్షన్లు రూ. 411 కోట్లు దాటాయి.

వారపు రోజుల్లోనూ 'ధురంధర్' జోరు తగ్గలేదు. సోమవారం రూ. 65 కోట్లు, మంగళవారం రూ. 56.60 కోట్లు, ఏడో రోజైన బుధవారం రూ. 48.25 కోట్లు సాధించి స్థిరమైన వసూళ్లను కొనసాగించింది. మొత్తం ఏడు రోజులకు గాను భారత్‌లో ఈ చిత్రం రూ. 623.97 కోట్ల నెట్ కలెక్షన్లు (రూ. 745.23 కోట్ల గ్రాస్) సాధించింది.

విదేశాల్లోనూ ఈ సినిమాకు ప్రేక్షకులు బ్రహ్మరథం పడుతున్నారు. ఓవర్సీస్ మార్కెట్‌లో ఏడు రోజుల్లో రూ. 261.92 కోట్ల గ్రాస్ వసూలు చేసింది. దీంతో సినిమా మొత్తం వరల్డ్‌వైడ్ గ్రాస్ కలెక్షన్ రూ. 1,007.15 కోట్లకు చేరింది. పాజిటివ్ టాక్‌తో దూసుకుపోతున్న ఈ చిత్రం, రాబోయే రోజుల్లో ఇంకెన్ని రికార్డులు సృష్టిస్తుందోనని ట్రేడ్ వర్గాలు ఆసక్తిగా గమనిస్తున్నాయి.