ట్రంప్ ప్రకటన ఎఫెక్ట్.. ఒక్కసారిగా పడిపోయిన క్రూడాయిల్ ధరలు

ఇరాన్‌తో యుద్ధాన్ని తాత్కాలికంగా ఆపేస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించిన నేపథ్యంలో, అంతర్జాతీయ మార్కెట్‌లో క్రూడాయిల్ ధరలు అమాంతం పడిపోయాయి. ఈరోజు ఉదయం 110 డాలర్లకు పైగా పలికిన బ్రెంట్ క్రూడాయిల్ ధర ట్రంప్ ప్రకటన తర్వాత 96 డాలర్లకు పడిపోయింది. ట్రంప్ ప్రకటించిన నిమిషాల్లోనే క్రూడాయిల్ 10 శాతానికి పైగా క్షీణించింది. ఆ తర్వాత కాస్త పుంజుకున్నప్పటికీ ఉదయంతో పోలిస్తే క్షీణించింది.

హర్మూజ్ జలసంధిని తెరవాలంటూ అమెరికా అధ్యక్షుడు డొనాల్డ్ ట్రంప్ ఇరాన్‌కు అల్టిమేటం జారీ చేశారు. ఇరాన్ కూడా ధీటుగా స్పందించింది. దీనితో చమురు ధరలు ఉదయం భారీగా పెరిగాయి. మే డెలివరీ బ్రెంట్ క్రూడాయిల్ బ్యారెల్‌కు 1 శాతం పెరిగి 113 డాలర్ల వద్ద, డబ్ల్యూటీఐ క్రూడాయిల్ 2.8 శాతం పెరిగి 101 డాలర్లు పలికింది. క్రూడ్ ధరలు మరింత పెరిగే ప్రమాదం ఉందని ఆందోళన వ్యక్తమైంది.

ఈ క్రమంలో రెండు రోజులుగా జరుగుతున్న చర్చలు సానుకూలంగా ముగిశాయని, అందుకే యుద్ధాన్ని ఐదు రోజుల పాటు తాత్కాలికంగా ఆపేస్తున్నామని ట్రంప్ ప్రకటించడంతో క్రూడాయిల్ ధరలు తగ్గుముఖం పట్టాయి. గత నెల 28 ప్రారంభమైన ఇరాన్, అమెరికా-ఇజ్రాయెల్ యుద్ధం 24 రోజుల పాటు కొనసాగింది. యుద్ధాన్ని తాత్కాలికంగా నిలిపివేస్తున్నామని ట్రంప్ చేసిన ప్రకటనపై ఇజ్రాయెల్ స్పందించవలసి ఉంది.