వాహనదారులకు తెలంగాణ సర్కార్ గుడ్ న్యూస్

తెలంగాణలో సొంతంగా వాహనం ఉండి, మరో కొత్త వాహనం కొనాలనుకునే వారికి రాష్ట్ర ప్రభుత్వం శుభవార్త చెప్పింది. రెండో వాహనం కొనుగోలుపై ఇప్పటివరకు విధిస్తున్న 2 శాతం అదనపు జీవితకాలపు పన్నును రద్దు చేస్తూ కీలక నిర్ణయం తీసుకుంది. ఈ కొత్త నిబంధన ఈ నెల 23వ తేదీ నుంచి అమల్లోకి రానుంది. దీంతో వాహన కొనుగోలుదారులకు పెద్ద ఆర్థిక ఉపశమనం కలగనుంది.

రాష్ట్ర రవాణా శాఖ ఈ నెల 23 నుంచి జాతీయ స్థాయి ‘వాహన్’ (VAHAN) పోర్టల్‌తో అనుసంధానం కానుండటమే ఈ మార్పునకు ప్రధాన కారణం. ఈ జాతీయ పోర్టల్ సాఫ్ట్‌వేర్‌లో ఒక వ్యక్తి పేరుపై ఎన్ని వాహనాలు ఉన్నా అదనపు పన్ను విధించే సదుపాయం లేదు. ఈ సాంకేతిక కారణం వల్లే రాష్ట్రంలో అదనపు పన్ను విధానానికి ప్రభుత్వం ముగింపు పలుకుతోంది.

ప్రభుత్వ నిర్ణయంతో ఇకపై రెండో వాహనమే కాకుండా, ఆ తర్వాత కొనుగోలు చేసే మూడో, నాలుగో వాహనానికి కూడా అదనపు పన్ను వర్తించదు. అయితే, ప్రతి వాహనానికి తప్పనిసరిగా చెల్లించాల్సిన సాధారణ జీవితకాలపు పన్ను (Life Tax) మాత్రం యథావిధిగా ఉంటుందని అధికారులు స్పష్టం చేశారు. ప్రతి ఏటా వేల సంఖ్యలో వాహనదారులు రెండో వాహనం కొనుగోలు చేస్తూ ఈ అదనపు భారాన్ని మోస్తున్నారు. ప్రభుత్వ తాజా నిర్ణయంతో వారందరికీ ఊరట లభించినట్లయింది.