కొత్త కాంట్రాక్టులతో బుమ్రాకు రూ.2 కోట్ల నష్టం.. పునరాలోచనలో బీసీసీఐ?

టీమిండియా సీనియర్ ఆటగాళ్ల కోసం బీసీసీఐ ప్రకటించిన కొత్త వార్షిక కాంట్రాక్టులు చర్చనీయాంశంగా మారాయి. ముఖ్యంగా స్టార్ పేసర్ జస్ప్రీత్ బుమ్రాకు ఈ కాంట్రాక్టుల వల్ల ఆర్థికంగా నష్టం వాటిల్లుతుండటంతో బోర్డు ఇప్పుడు దిద్దుబాటు చర్యలపై దృష్టి సారించినట్లు తెలుస్తోంది.

2025-26 సీజన్ (2025 అక్టోబర్ 1 నుంచి 2026 సెప్టెంబర్ 30 వరకు) కోసం బీసీసీఐ ఇటీవల 30 మంది ఆటగాళ్లతో సెంట్రల్ కాంట్రాక్టుల జాబితాను విడుదల చేసింది. ఇందులో భాగంగా 'ఏ+' గ్రేడ్‌ను పూర్తిగా రద్దు చేసింది. గతంలో ఏ+ గ్రేడ్‌లో ఉన్న ఆటగాళ్లకు ఏటా రూ.7 కోట్లు లభించేవి. అయితే, కొత్త విధానంలో అత్యున్నత గ్రేడ్ అయిన 'ఏ' కేటగిరీకి వార్షిక వేతనం రూ.5 కోట్లుగా ఉంది. టెస్టు, వన్డే కెప్టెన్ శుభ్‌మన్ గిల్, రవీంద్ర జడేజాతో పాటు జస్ప్రీత్ బుమ్రాను 'ఏ' గ్రేడ్‌లో చేర్చారు.

విరాట్ కోహ్లీ, రోహిత్ శర్మ వంటి వారు కొన్ని ఫార్మాట్ల నుంచి రిటైర్ అవ్వడంతో వారి గ్రేడ్‌లు తగ్గడం సహజమే. కానీ, మూడు ఫార్మాట్లలోనూ నిలకడగా రాణిస్తూ జట్టుకు కీలక బౌలర్‌గా ఉన్న బుమ్రా గ్రేడ్ తగ్గడం వల్ల అతని వార్షిక ఆదాయం రూ.2 కోట్లు తగ్గనుంది. ఈ నిర్ణయం పట్ల విమర్శలు వ్యక్తమవుతున్నాయి.

ఈ నేపథ్యంలో టైమ్స్ ఆఫ్ ఇండియా కథనం ప్రకారం బుమ్రాకు జరిగిన నష్టాన్ని పూడ్చేందుకు బీసీసీఐ మార్గాలను అన్వేషిస్తోంది. "బుమ్రా వంటి కీలక ఆటగాడి వేతనాన్ని రూ.7 కోట్ల నుంచి రూ.5 కోట్లకు తగ్గించడం సరైంది కాదు. అతనికి నష్టపరిహారం ఎలా చెల్లించాలనే దానిపై బోర్డు కసరత్తు చేస్తోంది. కాంట్రాక్టుల విలువను పునఃసమీక్షించే అవకాశం ఉంది" అని బీసీసీఐకి చెందిన ఒక అధికారి వెల్లడించినట్లు ఆ కథనం పేర్కొంది.  

బుమ్రాతో పాటు 'ఏ' గ్రేడ్ నుంచి 'బీ' గ్రేడ్‌కు పడిపోయిన కేఎల్ రాహుల్, మహ్మద్ సిరాజ్, హార్దిక్ పాండ్యా, రిషభ్ పంత్ వంటి వారి పరిస్థితి కూడా చర్చకు దారితీసింది. అదేవిధంగా, 'సీ' గ్రేడ్‌లో ఉన్న ఆల్‌రౌండర్ అక్షర్ పటేల్ కాంట్రాక్టును కూడా పునఃపరిశీలించవచ్చని తెలుస్తోంది. త్వరలో ప్రారంభం కానున్న ఐపీఎల్ 2026 సీజన్‌లో బుమ్రా ముంబై ఇండియన్స్ తరఫున బరిలోకి దిగనున్నాడు.