అనాథ దివ్యాంగురాలికి అల్లు అర్జున్ అండ.. జీవితాంతం పెన్షన్

ప్రముఖ సినీ నటుడు అల్లు అర్జున్ తన పెద్ద మనసును మరోసారి చాటుకున్నారు. కాకినాడ జిల్లాలో జరిగిన బాణసంచా పేలుళ్ల ఘటనలో తండ్రిని కోల్పోయి అనాథగా మారిన ఓ దివ్యాంగురాలికి ఆయన అండగా నిలిచారు. బాధితురాలి పోషణ కోసం జీవితాంతం నెలకు రూ.7,500 చొప్పున పెన్షన్ అందించేలా ఏర్పాట్లు చేసి నిజ జీవితంలోనూ హీరో అనిపించుకున్నారు.

కాకినాడ జిల్లా వేట్లపాలెంకు చెందిన కడింపల్లి దుర్గ మానసిక దివ్యాంగురాలు. భార్య మరణించడంతో ఆమె తండ్రి ధనరాజు తన కుమార్తెను కంటికి రెప్పలా చూసుకునేవారు. అయితే, గత నెల 28న గ్రామంలో జరిగిన బాణసంచా పేలుడు ప్రమాదంలో ధనరాజు మృతి చెందడంతో దుర్గ ఒంటరిగా మిగిలిపోయింది. ఈ విషాద గాథ సోషల్ మీడియా ద్వారా అల్లు అర్జున్ దృష్టికి చేరింది.

నిర్మాత బన్నీ ద్వారా అల్లు అర్జున్ ఫ్యాన్స్ అసోసియేషన్ ప్రతినిధులను శనివారం నేరుగా వేట్లపాలెం పంపించి వెళ్లి దుర్గ పరిస్థితిని తెలుసుకున్నారు. అనంతరం ఆమెకు శాశ్వత ఆర్థిక భరోసా కల్పించాలని నిర్ణయించినట్లు ఫ్యాన్స్ అసోసియేషన్ జనరల్ సెక్రటరీ బొలిశెట్టి సాగర్ వెల్లడించారు. ఈ పెన్షన్ మొత్తం ప్రతినెలా నేరుగా దుర్గ బ్యాంకు ఖాతాలో జమ అయ్యేలా చర్యలు తీసుకున్నామని ఆయన తెలిపారు.